Services

Tasiilami innuttaasut politiit takussaanerunissaat kissaatigaat

Tasiilami aalakoornartortalinnik imigassaarniarnerup sassaalliisarnerullu matoqqatinneqarneranilu innuttaasunik oqaloqatigiinnertalimmik ataatsimiititsisoqarpoq. Imigassartorsimanermik aallaaveqartunik sakkortuumik pisoqartarnera ajornartorsiuteqartoqalertarneralu siunissami pitsaaliorniarlugit suliniutinik aallartitsisoqarlunilu isumassarsianik saqqummiisoqarpoq, kissaatigineqarlunilu politiit aqqusinikkut angalaarnerulissasut.

Tasiilami innuttaasut septembarip ulluisa 14-ianni oqaloqatigiinnertalimmik ataatsimiitinneqarnerminni suliniuteqarusussuseqarlutillu isumassarsiaqarluarput. Innuttaasut nammineq ilaatigut suliniutigaat, angajoqqaat suleqatigiiffeqalissasut aamma unnuarissanik peqalissasoq. Angajoqqaat suleqatigiiffiat aallartisarlualeruttorpoq, unnuarissallu tujuulussatik kavaajassatillu Danmarkimiit tikeriarpata angalaartalissapput. Taakku saniatigut kissaatigineqarportaaq, 18-inik 21-llu akornanni ukiulinnut sammisassaqarnerulissasoq.

”Suliaq assut pitsaasumik ingerlanneqarpoq. Illoqarfimmi pissutsit pitsaanerulernissaat innuttaasunit annertuumik kissaatigineqarpoq, ingerlariaqqinnissatsinnullu isumassarsiatsialappassuarnik peqarpugut”, Kommuneqarfik Sermersuumi Tasiilami immikkoortumi pisortaq Hjørdis Viberg oqarpoq.

Oqartussanut siunnersuutit

Innuttaasut iliuuseqarfigisinnaasaminni angajoqqaatullu aamma nammineq kajumissutsiminnik suleqataaffigisinnaasaminni akuunissamut tunuarsimaanngeqaat. Innuttaasulli iliuuseqarfigisinnaanngisaannik aamma kissaateqartoqarpoq. Siunnersuutit ilagaat, aalakoornartortalimmik imigassarsisinnaanissamut killigititaq 21-nngortinneqassasoq, niuertarfinnilu immikkut ittuni tuniniarneqartalissasut.

Taakku saniatigut innuttaasunit aamma kissaatigineqarpoq, politiit aqqusinerni takussaanerulissasut. Politiit maannakkut nal. 16-ip kingorna angalaarneq ajorput – sianertoqartillugu orniguteriartaarfissaqanngikkaangamik. Innuttaasulli kissaatigaat, politiit ualerornerani unnunneranilu aqqusinermi takussaanerulissasut, tamanna toqqissisimanerulersitsisarmat.

”Siunnersuutit tamaasa piviusunngortissinnaanngilagut, iliuuserisinnaasagulli sapinngisamik piaartumik sulissutigissavagut. Siunnersuutit marlussuit piviusunngortinniarlugit aallartereerpagut”, Hjørdis Viberg oqarpoq.
 

Ataatsimiinnerit ingerlatiinnarneqassapput

Oqaloqatigiinnertalimmik ataatsimiinnermi siullermi isumassarsiat suliniutillu pitsaasut pillugit oqariartuutit peqitaaranngorlugit Tasiilami inoqutigiinnut agguaanneqassapput, taakkulu suliarineqaleruttorput. Isumassarsiatsialaat soorunami ingerlateqqinneqassapput, soorluttaaq isumassarsianut nutaanut inissaqartitsisoqartoq. Tamanna pillugu timersortarfimmi oktobarip 19-ianni oqaloqatigiinnertalimmik kingumut ataatsimiititsisoqassaaq.