Services

Sermersuumi missingersuusiornermi isumaqatigiissut

Kommuneqarfik Sermersuumi kommunalbestyrelse ataatsimoorlutik isumaqatigiittut oktobarip 27-ani, 2022-mut missingersuutissaq atsioqatigiissutigaat.

Pingasunngornerup unnuaata qaangiutilaarnerani, sisamanngorninngortorlu Kommuneqarfik Sermersuumi partiit qinigaatitaqartut tamarmik missingersuut 2022-moortoq atsioqatigiissutigaat. Isumaqatigiinneq pivoq sapaatit akunnerisa kingullerni kiisalu pingasunngornermi akunnerit arfineq-pingasut atorlugit isumaqatiginninniartoqareersorlu.
”Missingersuut siumut tikkuussisuuvoq kommunimilu innuttaasorpassuusunut sullissinermi pitsannguuteqartunik imaqarluni. Meeqqat atuarfiat pitsanngorsaaviginissaanut inuusuttunullu sunngiffimmi sammisassaqartitsinermut aningaasaliisinnaanerput immikkut nuannaarutigaara. Ilutigalu nuannaarutigaara partiit tamarmik peqataallutik missingersuummut atsioqataallutik peqataammata”, Kommuneqarfik Sermersuumi borgmesteri Charlotte Ludvigsen taama oqarpoq.

Oqaaseqaatit:

Ken Madsen, Naleqqami gruppemi siulittaasoq:

“Naleqqamiit nuannaarutigivarput 2022 missingersuutinut isumaqatigiinniarnermi Kommunetsinni partiit tamattaalluta naapeqatigiiffigisatsinnik siunnerfeqaratta. Meeqqaniit utoqqarnut atukkat oqimaaqatigiissumik ukkatarineqarnerat pingaarnerpaavoq, taamatullu aamma siunnerfeqaqatigiilluta ukiunut tullernut. Sanaartorneq annertusaaffigineqarnera sualummi illoqarfiit minnerni ajunngitsumik aallartippoq. Taamatullu ingerlanissaa ukiuni tullerni qularutissaanngilaq.”

Justus Hansen, Demokraatini gruppemi siulittaasoq:

“Missungersuummi atsioqataaneq Demokraatiniit tulluusimaarutigineqarpoq. Illoqarfiit minnerni aamma nunaqarfiit ukkatarineqartut kommunalbestyrelsemiit takutinneqarpoq, sanaartornerup ineriartortitsinerlu Nuummi kisimi pinngilaq. Tasiilami talittarfik pitsanngorsaaviginissaa aammalu Tasiilami Paamiunilu inissianik sanaartortoqarnissaa immikkut nuannaarutigaakka. Innuttaasut inuunerannut pitsanngorsaataaginnarani aamma kommunemi oqimaaqatigiissaarineq pivoq. Missingersuusiornermi aqqut oqittuinnaasanngikkaluartoq nuannaarpunga kommunalbestyrelse tamarmiusoq kommunip siunissami ineriartornissaa isumaqatigiissutigalugu tapersersuimmata.”

Inga Dora G. Markussen, Siumumi gruppemi siulittaasoq:

Kommunalbestyrelsemi ilaasortat nutaat maajip sisamaanili ivertinneqarmata siunnersuutit Siumumeersut arlaqartut kommunalbestyrelsemit ataatsimoortumik akuerineqartarsimapput. Ilutigalu Siumut illuatungiliulluartutut inissisimasimavoq, kommunemi kukkussutit amigaatillu tikkuartuunnarnagit aaqqiissutissanik siunnersuuteqartarsimalluni. Taamaammat nuannaarutigaarput suliat pingaartilluinnakkavut amerlasuut missingersuusiornermi ilanngunneqarmata. Inissiat tamanut iluaqutaasussat sananeqarnissaat amerlanerussuteqartunit tusaaneqarlutik tigulluarneqarsimaneri immikkut nuannaarutigaarput – aamma Nuummi, taavalu Tasiilami, Paamiuni Ittoqqortoormiinilu sanaartortoqarnissaa immikkut isiginiarneqarsimaneri nuannaarutigaagut. Missingersuummi suleqataalluni atsioqatigiinneq ukiuni tulliuttuni aggersuni piviusunngortinneqarnissaannut Siumut akisussaaffimmik tiguseqataaneranik malitseqarpoq. Isumaqatigiinninniarnerni naaperiaasinnaaneq pissusissamisoorpoq. Isumaqatigiissummi peqataaneq sunniuteqarsinnaannginnermiit pinnatassaqarneruvoq. Taamaammat missingersuummik isumaqatigiinnermi unnuaq atsioqataavugut. Siunniussat pitsaasut innuttaasunut iluaqutaasussat missingersuummilu aningaasaliissutigineqartut piviusunngortinneqarnissaat suleqataaffigissavarput. Suliniutit aningaassaliiffigineqanngitsut, soorlu piffinni tamani inuussutissarsiornikkut siuarsaanissat, sukataarutigalugit sulissutigeqqissavagut. Suleqatigiilluarneq ingerlateqqinnissaa Siumumiit qilanaaraarput.  

Juaaka Lyberth, Inuiat Ataqatigiinni gruppemi siulittaasoq:

Inuit Ataqatigiinni nuannaarutigaarput Kommuneqarfik Sermersuumi kommunalbestyrelsimi partiit tamarmiusut Aningaasartuutissanut Missingersuut atsioqataaffigimmassuk. Atsioqatigiinneq pingaaruteqartumik ersiutaavoq, kommunitta ukiuni tullerni sisamani kommunitta ineriartorteqqinnissaanut kommunalbestyrelsimut ilaasortat tamarmik akisussaaqataanermik tigusinerannik. Kommunitsinni inoqarfiit tamarmik ineriartortinneqarnissaat Missingersuusiami inissaqartinneqarput, innuttaasullu qitiutinneqarput. Isumaqatigiissutsikkut innuttaasut pitsaanerusumik sullinniarpavut. Ilaqutariit toqqissisimasuutinniarlutigit aamma innarluutillit pitsaanerusunik ikiorsertassallutigit.. Atuarfinnut meeqqerivinnullu aningaasaliissutit amerlivavut, inuusuttortartinnullu nereroorutivut ineriartortissallutigit. Inuuneq tamanut imaqarluartuusariaqarpoq, minnerunngitsumillu kommunitsinni inissialiortitsernernut pilersaarutit ingerlatiinnarneqassapput. Utoqqartavut paarilluassavavut, illoqarfivut tamanik tikilluaqqusaaffiussallutik, soorlulittaaq kulturerput timersornerpullu piorsartuassagivut. Kiisalu Inuit Ataqatiinnut pingaartuuvoq aningaasartuutissanut Missingersuut akisussaassuseqarluartuunissaq. Kommunitsinni sanaartugassat atassuteqaatinullu tunngasut ilaat ukiumik ataatsimik marlunnilluunniit kinguaallatsittariaqarsimavavut. Assiliarlia tamaat ataatsimut isigigaanni kommunitta inuussutissarsiornertigut ineriartortinneqarnera ingerlaannassaaq pitsaasunik sinaakkusersorneqarluni. Taamaattumik, ataatsimut isiginnilluta IA-miit isumaqatigiissut iluarisimaartorujussuuvarput, aamma tassuunakkut takutinneqarmat kommunitta tamarmiusup ineriartortinneqarnissaanut kommunalbestyrelsimut ilaasortat tamarmik suleqatigiilluarusussuseqartut.

Missingersuut isumaqatigiissutigineqartoq tamaat uani atuarsinnavat: 2022-mut Missingersuutinut isumaqatigiissut


Borgmesteri gruppenilu siulittaasut missungersuut atsioqatigiissutigigaat. Saamimmiit: Justus Hansen, Inga Dora G. Markussen, Charlotte Ludvigsen aamma Juaaka Lyberth. Ken Madsen oqarasuaatikkut peqataammat assimi ilaanngilaq.