Services

Pitsaaliuinermik sulineq ingerlalluarpoq unitsitassaananilu

Pitsaaliuinermik siunnersortit suleqatiminnik Kommuneqarfik Sermersuumilu suliffeqarfinnik allanik suleqateqartarnertik pitsanngorsartuarpaat kiisalu inuusuttut siunissaat pitsaanerulersinniarlugu ikiorneqarnissamillu pisariaqartitsigunik sumut saaffiginnissinnaanerminnik ilisimasaat annertusarniarlugu annertuumik suliaqartarput.

Septembari, aamma Imminut toquttarneq pinaveersaartinniarlugu qaammat taanna malunnartinneqarnissaanut atorneqartartutut ilisimaneqarluarpoq, tassungalu atatillugu arlallit sapinngisartik tamaat atorlugu inunnik paasititsiniaanermut atortarpaat. Taamatuttaaq pinaveersaartitsinermut siunnersortit suliaqartarput, qaammammilu matumani Kalaallit Nunaanni inuusuttunut imminut toquttarneq atornerluisuusarnerillu assigiinngitsut pillugit paasititsiniaanermut suliat annertuut ingerlanneqartarput.

Tamatumunnga assersuutit ilagaat Paamiunut tunngasoq, matumani pitsaaliuinermut siunnersorti Anja Weiss Paamiuliarpoq pitsaaliuinermut siunnersorti Augustine Rosing inuusuttunut atornerluisarnerit assigiinngitsut aamma imminut toquttarneq pillugit paasititsiniaaneranut tunngatillugu ikiorniarlugu.

”Paamiuliarnissamut suliniuteqarnermut pissutaavoq, Meeqqanut Ilaqutariinnullu Ataatsimiititaliamit nalunaarutigineqarmat, illoqarfimmi inuusuttunut pinaveersaartitsinermut tunngasunik oqalugiartoqarnissaa iluaqutaassasoq. Taqqavunnarninnut pissutaavortaaq, Augustinelu pitsaaliuinermut periutsivut isumassarsiavullu pitsanngorsarsinnaaniassagatsigit, taamaaliornikkullu Kommuneqarfik Sermersuumi kikkut tamarmik pitsaanerpaamik ikiorserneqarnissaat isumagineqarniassammat”, pitsaaliuinermut siunnersorti Anja Weiss ajorpoq.

Paamiuni septembarip ulluisa 14-ianniit 23-at ilanngullugu Atuarfik Tuiisami, Majoriami/Piorsaavimmi aamma Klub Kalaalermi saqqummersitsinerit ingerlanneqarput.

Assut soqutigineqarluarsimavoq

”Inuusuttut saqqummersitsinerni assut pimoorussipput, naak sammineqartut oqimaakkaluaqisut”, pitsaaliuinermut siunnersorti Augustine Rosing oqarpoq.

Inuusuttut oqaloqatigineranit pitsaaliuinermut siunnersortit digitalikkut pimmatiginnittarneq ulluinnarni annertuumik atugaalersimasoq tamannalu ajornerpaamik kinguneqartartoq paasivaat.

”Digitalikkut pimmatiginnittarneq pillugu oqaloqatigiinnissaq kiisalu ajornartorsiut ilungersunartuusoq, ulluinnarnilu teknologii taamak sukkatigisumik ineriartortuummat pinngitsoorneqarsinnaananilu, paasineqarnissaa pisariaqartinneqarpoq. Inuusuttut digitalikkut pimmatiginnittarnermik misigisaat eqqartorparput – inuit attaveqatigiittarfiisigut kisimi pinnani ajornartorsiutaasartoq tupaallannarpoq, aammali pimmatiginnittarnerit amerlasuut pinnguaatini atorneqartuni pisarput”, Augustine Rosing oqarpoq.

Digitalikkut pimmatiginnittarnerup aamma imigassamik atornerluisuunerup saniatigut klassinut angajullernut Think Inuk, imminut toquttarnermut tunngasoq, aamma PAS Majoriami/Piorsaavimmi suliniut, ikiaroornartumik hashimik pinaveersaartitsinermut tunngasoq, saqqummiunneqarput. Klub Kalaalermi imigassamik atornerluineq eqqartorneqarpoq, tassanilu Paamiuni pilersinneqaqqammersut Natteravnene ilisaritinneqarputtaaq.

Tamatuma saniatigut pitsaaliuinermut siunnersortit inuusuttut assigiinngitsutigut, soorlu Tusaanngamit, atuarfimmi aamma Meeqqanut Ilaqutariinnullu Sullissivik Tiliumit, ikiorserneqarsinnaanerat pillugu sukumiisumik eqqartuisoqarnissaa isumagaat.