Innuttaasunut

Paassaaviit atorunnaarnerisigut Nuummi illoqarfimmik ineriartortitsinissamut periarfissaqalissaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuummi nutaamik paassaasivittaarnissap akuersissutigineqarneratigut illoqarfimmik ineriartortitsinissamik pilersaarutit ingerlateqqinneqarnissaat qaninnerulersippaa. Maannakkut paassaasiviit atorunnaarsinnerisigut Kuanninnguani illuaqqiornissanik atuartullu tammaarsimaarfissaannik kommunip pilersaarutaanik kiisalu Nuummi Arctic Parkiliornissamik pilersaarutit piviusunngortinneqarsinnaalerput.

Kommunalbestyrelsip oktobarip tallimaanni ataatsimiinnermini nutaamik paassaasivittaarnissamik pilersaarut akuersissutigaa, taamaalilluni illoqarfiup ineriartortinneqarnissaata ingerlateqqinnera isumannaatsumik ingerlanneqarsinnaalersillugu.

Nuummi sumiiffinni assigiinngitsuni marlunni ullumikkut paassaasiveqarpoq. Ataaseq Qinngutta illoqarfiullu nutaartassaata Siorarsiorfiup akornanni inissisimavoq. Aappaa mittarfiup avannamut kangiatungaani paarnaarussivittaap eqqaani inissisimavoq, taannalu mittarfiup tallineqarneranut atatillugu Munckikkunniit atorneqarpoq.

Nuummi ineriartortitsinerup isumannaatsumik ingerlateqqinneqarsinnaaqqullugu Sanarfinermut Avatangiisinullu Ingerlatsiviup nalilersimavaa, maannakkut paassaasiviusut atorunnaarsinneqartariaqartut, tamannalu tunngavigalugu Nutaamik paassaasiviliornissamik pilersaarut saqqummerpoq.

”Paassaasivinnik atorunnaarsitsineq Nuummi ineriartortitsinissamut annertuumik alloriarneruvoq. Nuummi Arctic Park, atuartunut tammaarsimaarfissamut allanullu inissaqartitsinitsigut innuttaasut takornariallu pitsaanerujussuarmik atugassaqartissavagut”, Sanarfinermut Avatangiisinullu ataatsimiititami siulittaasoq, Justus Hansen oqarpoq.

Maannakkut paassaasiviusut sumiiffiisa ajornartorsiutaanerat

Qinngutta avataatungaani allilerinerup kinguneraa, Pinguaqqami inissialiortoqarneratigut aamma Isuliffimmi inuussutissarsiuteqarfiup allilerneqarneratigut paassaasivimmut qanilligaluttuinnarneq. Tamatumalu kingunerisaanik Siorarsiorfiup tungaanut inerisaanermi (tungaanut aqqusinniornermi sullorsualiornissamilu), paassaasivik eqqarsaatigalugu isumannaallisaanermi killigititaasup iluaniilernerat. Isumannaatsumik ineriartortitsineq ingerlaannaassappat paassaasivik taanna nuunneqartariaqarpoq.

Paassaasiviup nuunneqarnissaanik pilersaarutaaqqaaraluarpoq, parnaarussivittaap eqqaani paassaasivik ataasiinnanngortillugu ataatsimoortinneqassasut. Tassaniitiinnarneqarneratigulli Kuanninnguani illuaqqiornissat atuartunullu tammaarsimaarfiliornissaq kiisalu Nuummi Arctic Parkiliornissaq piviusunngortinneqarsinnaassanngillat, taakkununngalu tunngasoq paasisaqarfiginerusinnaavat uani.

Illoqarfiup ineriartortinneqarnissaa matuma siuliinilu taaneqartut pilersaarutit piviusunngortinneqarsinnaaqqullugit paassaasiviit pioreersut atorunnaarsinneqartariaqarput, nutaamillu ataavarnerusumik inissillugu pilersitsisoqartariaqarluni. Isumannaallisaaneq pingaarnerpaatinneqartuaannarpoq.

Paassaasiviit pioreersut atorunnaarsinneqarnissaannut kiisalu nutaamik paassaasivittaarnissamut periarfissamik Sanarfinermut Avatangiisinullu Ingerlatsivimmit misissorlugu maanna aallartisaleruttorneqarpoq, tamanna aamma akuersissutigisassanngorlugu saqqummiunneqarniassammat.