Services

Nuummi Eqqumiitsulianik Saqqummersitsivimmi kulturisiorluni takusassarsiorneq

Qulequtaq ”Journey//Angalaneq//Rejse” qitiutillugu Nuuk Nordisk Kulturfestival oktobarip 28-anni aallartittussami, Nuummi Eqqumiitsulianik saqqummersitsivik eqqumiitsulianik assigiinngitsunik saqqummersitsisussaavoq, nunasiaataanermut tunngasunik ujartuinerit, ilisimasassarsiornerit aammalu eqqumiitsuliortut arfinillit assigiinngitsut kulturikkut naapeqatigiinnerannik.

Nuuk Nordisk Kulturfestivaleqarnerani pisussat amerlaqaat. Eqqumiitsuliat Nuummi Eqqumiitsulianik saqqummersitsivimmi takutinneqartussat ilanngulugit. Saqqummersitsinerit assigiinngitsut takuneqarsinnaasut tassaapput ”Atlantikumi//i Atlanterhavet” af Jeannette Ehlers, Jessie Kleemann aamma Pia Arke, ”Oqaasiitsut//De Sprogløse” Jukke Rosing aamma Marte Lill Somby, ”The Characters” Tonje Bøe Birkelandimit aamma ”Reflecting Nuuk Nordic” utersaarnerit takutinneqassallutik, tassanilu eqqumiitsuliortut assigiinngitsut naapinneqarsinnaassallutik.

Saqqummersitsineq ”Atlantikumi//i Atlanterhavet” tassaavoq eqqumiitsuliortut arnat Ehlers, Kleemann aamma Arke saqqummersitaat, tamarmik immikkut nunat marluk akornanni kinaassutsimik takutitsisut – Atlantikumit avissaartinneqarlutik.

Atlantiku ukiorpassuarni inunnik ataqatigiisitsisuullunilu avissaartitsisuusarpoq. Atlantiku toqqammavittut atuuffeqartuarsimavoq, pissaanermut tunngasut inuillu inuunerminni atugaat pissanganartorsiorfiusarsimallutik. Tassaniipput eqqumiitsuliat, arnat pingasut eqqumiitsuliortut namminneq allallu oqaluttuassartaat Atlantikumut tunngatillugu aallaavigimmatigit.

Saqqummersitsineq takuniarneqarsinnaavoq oktobarip 28-anni nal. 17.30-miit januaarip 31-ata 2022-p tungaanut.

Ilutsinnik avatitsinnillu paasisassarsiornerit

”Oqaasiitsut//De sprogløse” saqqummersitaavoq, qajannassuseq aammalu Jukke Rosingip aamma Marte Lill Sombys misigisaannik kulturiinillu assigiinnik takutitsisoq. Taakkua kinaassutsiminnik ujartuinerminnik oqaluttuarput, aammalu suut namminneq annaasaqaatigisimasatik nassaariniarlugit – oqaatsitik (kalaallisut saamisullu).

”The Characters” tassaavoq piviusuunngitsunik arnat namminneq najuunnermikkut ilisimatuussutsimullu tunngasutigut pissusiinik takutitsisoq.

Saqqummersitsinerit marluk taakkua oktobarip 28-anni nal. 17.30 ammassapput.

Eqqumiitsuliortut immikkullu sammisallit oqalliseqatiginerat

Utersaartitsineq ”Reflecting Nuuk Nordic” aallartissaaq nal. 12.30 oktobarip 28-anni. Tamanna tuluttut ingerlanneqassaaq. Tassani qulequttat soorlu nunami namminermi katersugaasiviit ”memory politics” qaqinneqarumaarput. Taakkunani pineqarpoq uagut inuiaqatigiittut qanoq qinersisarnersugut, suut eqqaamasarialittut pingaaruteqarnersut aammalu qanoq. Tassunga atatillugu aamma nunanik kannguttaatsuliortarnerit nunasiaateqarnerillu eqqartorneqassapput, ”Nuuk Nordisk”-eqarneranut atatillugu nunat avannarliit unammillerneqartarnerat ilutigalugu.

Utersaartitsisoqarnermut tunngasoq suliarineqarpoq Nuummi Eqqumiitsulianik saqqummersitsivik, The Art of Nordic Colonialism, saamit eqqumiitsuliartoqatigiit Daiddadallu aamma Nuuk Nordisk Kulturfestival aaqqissuussisut suleqatigiillutik suliarivaat.