Pia Arkep nuannarineqarnera 2007-imi toqunerata kingorna annertusigaluttuinnarsimavoq, qujanartumillu Nuummi Eqqumiitsulianik Saqqummersitsiviup Ny Carlsbergfondetimit annertuumik aningaasaliiffigineqarnermigut suliaanik pisisinnaanngorsimavoq, taakkunani takutinneqarlutik taassuma kalaaliussuseqarluni qallunaajussuseqarlunilu inuunermi sammivii.
Arke-p suliaani Nunatsinni kikkut tamat ornissinnaasaanni katersaatit marluinnaat pigineqarsimagaluarput. Ataaseq Nunatta Katersugaasivianit pigineqarpoq, aappaalu Narsami Katersugaasivimmit pigineqarluni. Nuummi Eqqumiitsulianik Saqqummersitsiviup Piar Arke-p suliaanit katillugit sisamat 2017-imi 2019-imilu pigilerpai. 2021-milu nutaanik kingumut pisisoqarneratigut Nunatsinni pisortanit pigineqartuni katersaatit 15-inik ilapput, taakkulu ilagaat suliaani tusaamaneqartut marluk tassaasut Tupilakosaurus, taanna aalasuliaavoq 9 minutsinik sivisussuseqartoq aamma ”Scoresbysundhistorier” 2003-meersoq, katitikkanik arlalinnik assitalersugaq.
”Pia Arke-p suliaanik pingaaruteqartunik arlalinnik Nunatsinnut utertitsinissamut kingullerpaatut periarfissatut isigaarput. Tamanna pillugu pisinerput avammut saqqummiussinnaanngornera assut nuannaarutigalugulu oqiliallaatigeqaarput. Ny Carlsbergfondetip tapiissuteqarneranut qamannga pisumik qujangaarpugut”. – taama oqarpoq Nuummi Eqqumiitsulianik Saqqummersitsivimmi aqutsisoq, Nivi Christensen.
Pia Arke-p suliaani amerlanerit marloqiusamik kinaassuseqartutullusooq suliaapput, tassa imminerminut tunngatittaramigit Kalaallit Nunaanut aamma Danmarkimut attaveqarnini eqqarsaatigalugit. Arke eqqumiitsuliortuni siulliit ilagalugu Danmarkip Kalaallit Nunaatalu akornanni nunasiaataanermi attaveqatigiinnermi imaannaanngissinnaasunut misigissutsinullu tunngasut quianartunngorlugit imminullu qiviarnertut ilillugit suliaqartalerpoq.
Suliai arlalissuit Nunani tamalaani katersugaasivinniillutillu inuinnarnit pigineqarput. Suliaani pisiat kingulliit ilai Danmarkimi Humlebækimi eqqumiitsulianik saqqummersitsivimmi Louisianamit attartorneqarput.
Pia Arke-p suliaanik saqqummersitsineq taaguusilerlugu ”Pia Arke – Drøm og Fortrængninger” eqqumiitsulianik saqqummersitsivimmi Louisianami 2022-mi januaarip aappaa tikillugu takusarneqarsinnaapput. Saqqummersitsineq naammassippat Odense-mi Eqqumiitsulianik saqqummersitsivimmut Brandtsimukaanneqassapput aamma Kunstenimut Aalborgimiittumut. Suliai kingullertut pisiat Nuummi Eqqumiitsulianik Saqqummersitsivimmi 2022-p naalernerani alakkarneqarsinnaanngussapput.
Tupilakosaurus Still 
Uden Titel 
Hulkamera 
Dummy 1995-2003