Oktobarip 28-aniit 31-ata tungaanut Nuuk kulturimut tunngasunik neqeroorutissanik ulikkaassaaq.
Nuuk Nordisk Kulturfestival 2021 “Journey//Angalaneq//Rejse” qulequtarissavaa. Festivalip iluani nunat avannarlerniit takutsitisussat, Kalaallit Nunaanniillu nuannernerpaat assigiinngitsut misiginnissinnaavatit. Programmi uani takuuk.
Saqqummersitassat alakkarsinnaasatit ilaa ukuupput, Jukku Rosing Kalaallit Nunaanniit, Norgimiorlu Marte Lill Somboy sanaavi “De Sprogløse”, taanna H.J. Rinksvejimi blokkini takutsinneqassaaq. Aamma Killumi Tonje Bøe Birkelandip saqqummersitassaliaa “The Characters” alakkarsinnaassavat. Saqqummersitassat taakkua festivalip ingerlanerata tamaat ammassapput.
Aammattaaq isiginnaartitassaliannik soqutiginerusaqaruit periarfissanik ulikkaarputit. Vivi Sørensenip takutsitassaa “Arnarulunnguaq” alakkarsinnaavat, immaqaluunniit Bobbi Lo-p isiginnaartitsiliaava “Do As I Say”. Teatro Potlach, Italiaminngaanneersut aamma Nuummut pulaariartussaapput isiginnaagassiaat “20.000 Leagues Under the Sea” takutsinniarlugu.
Unnuit tamaasa festivali ingerlanerani aamma assigiinngitsunik tusarnaartitsisoqarumaarpoq. Tusarnaartitsisussat akornanniipput Islandimiit Ásgeir, qallunaat Klumben & Raske Penge, Kalaallit Nunaaninngaanertullu arlallit soorlu Pukuut, Kunngi Ilanilu, Jens Kleist, Piitsukkut, Andachan allarpassuillu.
“Suleqativut peqatigalugit pikkunartumik tamatigoortumillu programmiliornikuuvugut. Taannalu peqataasussanut takutinnissaanut qilanaarutigaarput. Ukioq manna billitsit akikittuaranngortinnikuuarput, neriuppugullu illoqarfik tamaat tigulluarumaaraat, festivali ingerlanera nuannertunngortissagaallu”, festivalimi aqutsisoq Jonas L. Nilsson oqarpoq.
Kalaallit Nunaanniit, Nunat Avannarlinniillu kulturikkut namminneq angalaaqataalluarnissat neriuutigaarput.
Billetsit 299 kr.-niinalik pisiarereersinnaavat. Inuusuttut 13-iniit 17-inut ukiulinnut akia affaannaavoq. Meeqqanullu 12-niit ammut akeqarnaviarnani.