Services

Kommuneqarfik Sermersuup Ataqqinartorsuaq Dronningi ilassivaa

Ataqqinartorsuaq Dronningi Nuummut tikeraarpoq, sapaammilu oktobarip qulinganni kommunip aaqqissugaannut assigiinngitsunut peqataavoq. 

Eqqaassutissamik uleersineq ukiunillu 100-nngortorsiorneq
Sapaat aallartippaa Nunatta Katersugaasivianut pulaarluni, tamatuma kinguninngua malitseqarluni pisummik Nuup Saavani Christiaat qulingata Dronning Alexandrinellu 1921-mi tikeraarmata malunnartinniarlugu eqqaassutissiamukarpoq. Tassani borgmester Charlotte Ludvigsenip Ataqqinartorsuaq Dronningi ilassivaa, tikeraarneralu malunnartinniarlugu eqqaassutissiatut allattuiffik ujarattaanut ikkunneqarsimasoq uleerneqarpoq.

Ujaqqamut eqqaassutissamut taamatut uleersineq immikkooruteqartuuvoq, tassami ukioq manna ukiut 100-t qaangiupput Dronningip aataava Kunngi Christiaat qulingat Nunatsinnut kunngini siullersaalluni tikeraarmat.

Ilanngutassiaq assit ataanni ingerlaqqippoq

Rådhusimut pulaarneq
Nuup Saavaniit Nuup rådhusianut ingerlaqqipput, tassanissaaq Kommuneqarfik Sermersuup borgmesteriata Charlotte Ludvigsenip Dronningi tikilluaqquaa. 

Rådhusimiinnermini Ataqqinartorsuup Dronningip kommunalbestyrelsip ataatsimiittarfiani kommunalbestyrelsimut ilaasortat allallu oqaloqatigai, kommunimilu atorfillit kommunalbestyrelsimut ilaasortat Dronningilu saqqummiiffigaat.

Ilaatigut Nivikka Witjes SIU-TSIU-mit Tasiilameersoq Kalaallit Nunaanni inuusuttut ilinniartitaanerup suliffissarsiornerullu avataaniilersimasut pillugit aningaasatigut isumaginninnerup iluani ingerlatsisarneq pillugu saqqummiivoq.

Siorarsiorfik – Nuuk City Development aamma kommuneqarfimmi illoqarfiup iluani ineriartortitsinermi suliniutit pillugit saqqummiussaqarpoq. 

Tamakku saniatigut Michael Rosing kommunip igaffiutaa nutaaliorfiusoq FoodLab pillugu saqqummiivoq, suliniutip tamatuma siunertaraa Kalaallit Nunaanni nerisassat tungaasigut aallarnisaasartut suliniut taamaattoq aqqutigalugu tunngavissiorneqassasut. 

”Ataqqinartorsuaq Dronningi tikilluaqqussallugu ataqqinaataaginnarani assut nuannerpoq. Ullumikkut ulloq  assut pissanganartuusimavoq, tulluusimaarutigeqaarpullu kommuneqarfipput Dronningimut taamatut takutissinnaagatsigu. Kommuneqarfipput ullumikkut qanoq ittuunersoq kisiat pinnagu, kisianni aamma siunissami sumut ingerlanersoq takutipparput. Tullissaani Ataqqinartorsuup Nunatsinnut tikeraarnissaa qilanaarilereerparput, soorunami aamma kommuneqarfitsinnut,” borgmester Charlotte Ludvigsen pulaarneqarsimanertik ullorlu immikkuullarissoq pillugu taama oqaluttuarpoq.

Ilanngutassiaq assit ataanni ingerlaqqippoq

Rådhusimut pulaareernermi kingorna Ataqqinartorsuaq Dronningi Hans Egedep Oqaluffianukarpoq, tassani Paneeraq Siegstad Munk biskopitut ivertinneqassammat. 

Katuami kaffisoqatigiinneq 
Ualikkut Katuami kaffisoqatigiinneqarpoq innuttaasullu tassunga biskopeqarfiup Kommuneqarfik Sermersuullu aaqqissugaanut qaaqquneqarsimapput. Kaffisoqatigiinnermi borgmester Charlotte Ludvigsen Ataqqinartorsuaq Dronningimut oqalugiarpoq, Ataqqinartorsuarlu Kommuneqarfik Sermersuumit tunissuteqarfigineqarpoq. 

Tunissutigineqartoq tassaavoq eqqumiitsuliortup Dorit Olsenip igalaaminermik skåliliaa, eqqumiitsuliaanilu ilaatigut takuneqarsinnaavoq sermersuaq kommuneqarfiup katinngatigalugulu avissaarfigisaa.  

Ataqqinartorsuaq Dronningip ullormut pisut naggaserpai Hans Egedep Illuani tusagassiortunik katersortitsilluni, tamatumalu Hotel Hans Egedemi nerersuartoqarpoq biskopinngortitsineq nalliuttorsiutiginiarlugu.