Nuummi misissuivik illoqarfiup qeqqaniit Inussivimmut nuunneqarnissaa pisortat suliffeqarfiutaani susassaqartut assigiinngitsut suleqatigeeqqissaarnissaat pisariaqarluinnarsimavoq. Nunarsuaq tamakkerlugu tunillaassuuttoqarnerani suliassat nalinginnaasuunngittut suliarisariaqartarneranik ilaatigut kinguneqartarpoq. Tamanna Kommuneqarfik Sermersuumi sulisut aqqusaarsimavaat.
Suliaq kusanartumik aaqqissuunneqassatillugu pissutsit assigiinngitsut ataqatigiissarluarneqartariaqarput. Tamanna nunarsuaq tamakkerlugu coronamik tunillaassuuttoqarnerani minnerunngitsumik atuuppoq, ilaanni pissusitoqqat avataatigut eqqarsarnissaq pisariaqartarsimalluni.
Nuummi Misissuivik assersuutissaqqippoq. Nunarsuaq tamakkerlugu tunillaassuuttoqarnera ilaatigut ima sakkortutigisimavoq allaat misissugassanik tigooraaneq peqqinnissaqarfiup avataatigut pisariaqarsimalluni, soorlu aamma misissuisarfiit allamut inissinneqartariaqarsimallutik.
Tamanna taamaallaat pisinnaasimavoq suleqatigiilluarnikkut, suleqatigiilluarnerullu aamma kingunerisimavaa Nuummi Misissuivik illoqarfiup qeqqaniit Inussivimmut nuunneqarsinnaaneranik.
Isumagisassat amerlasuut
Misissuivik nuuginnarnissaani oqaannarnermiit ajornarneruvoq, ingammik corona eqqartortillugu. Kommuneqarfik Sermersuumi sanaartornermut immikkoortortaqarfimmi pisortaq Rasmus Hansen tamanna pillugu ima oqarpoq.
”Suliassat nalinnginnaasumik suliarineq ajukkavut suliarisariaqarsimaneri, piffissallu sivikitsup iluani pimmat, ulappinnarsimavoq. Taamaammat Inussiviup pequtaasiviani allaffiliortariaqarsimavugut”, sanaartornermut immikkoortortaqarfimmi pisortaq taama oqarpoq.