Services

Innarluutilinnut sapaatit akunnerutinneqartoq ullumikkut aallartippoq – Nuummi Paamiunilu

Inunnut innarluutilinnut sapaatit akunneritinneqartartoq, sapaatip akunnera 41, ukioq manna aamma ingerlanneqaqqissaaq, inersimasullu innarluutillit ukioq manna immikkut ukkatarineqarniarput. Ataatsimiititaq innarluutillit ineqarfiini assigiinngitsuni sulisunit inuttaqartinneqartoq peqataasussanut pissanganartumik nuannersumillu pilersaarusiorsimapput.

Innarluutilinnut sapaatip akunnerutinneqartoq ataasinngornermi oktobarip 11-ani nal. 11.00 Amisuni aallartinneqassaaq, tassani Suliffeqarnermut Isumaginninnermullu Ataatsimiititami siulittaasoq Inge Olsvig Brandt ammaalluni oqalugiassaaq. Oqalugiartoqareerpat Sammisassaqartitsinissamut katerisimaaqateqartitsinissamullu neqeroorut Kammagiinnut ingerlaaqatigiittoqassaaq.

Sapaatip akunnerata ingerlanerani peqataasut aalisariartinneqassapput, pisatik tisassavaat aqaguanilu nereqatigiissallutik. Aamma Kammagiinni bankoqatigiikkumaarput, allarpassuarnillu sammisassaqarlutik.

”Nuummi suliffeqarfiit tapersersuilluarsimapput. Taamaasilluni sisamanngornermi bankortoqalerpat pissanganartunik pinnatassaqarluni.” Bettina Hagerup Andersen Kommuneqarfik Sermersuumi Innarluutilinnut aamma tarnikkut innarluutilinnut immikkoortortami siunnersorti taama oqarpoq.

”Paamiuni ammaanersiornermi ullaakkorsioqatigiittoqassaaq, kingornalu allagartarsualerlutik ingerlaaqatigiissapput. Sapaatip akunnerata ingerlanerani saarullinnik pilisoqassaaq, innarluutillit peqatigiiffiat (piginnaassusikitsut) peqatigalugit aliikkusersorumaarput, timersoqatigisartagaat utoqqaat QIIMMAALLUGUKKUT ataatsimuualaaqatigiumaarlugit, allarpassuarnillu sammisassaqarumaarluni.” Andrine Jensen, Paamiuni Innarluutilinnut aamma tarnikkut innarluutilinnut immikoortortami aqutsisoq taama oqarpoq.

Sapaatip akunnerata naanerani Nuummi Paamiunilu OCN-imik naammassinnissimanermik uppernarsaatinik ugguaasoqassaaq. Open College Network, imaluunniit ulluinnarni OCN-imik taasagarput ilinniarnermik ingerlatsiffiuvoq akuerisaasoq, tassani innuttaasut piginnaasaqarfimminni ilinniagaqarnikkut allagartartaarsinnaallutik. Open College Network periusiuvoq pisortatigoortumik ileqquusumillu ilinniartitaanerup avataatigut piginnaasanik ilikkakkanillu naleqarluartitsisoq.

Nuummi ammaanersiornermili oqalugiartoqarnera minillugu aaqqissuussat tamarmik peqataasussanuinnaq peqataaffigineqarsinnaapput, tamanna Covid-19-imik pinaaveersaartitsinissamut maleruagassat peqqutaapput