Meeqqat, Inuusuttut Ilaqutariillu

Upalungaarsimasoqalereerpoq: Meeqqat inuusuttullu kinguaassiuutitigut innarlerneqarsimasut ikiorniarlugit

”Kommunip, politiit peqqinnissaqarfiullu akornanni nutaamik suleqatigiittoqalernera assut nuannaarutigaara” Avaaraq Olsen, Kommuneqarfik Sermersuumi Meeqqanut Ilaqutariinnullu Ataatsimiititami siulittaasuusoq oqarpoq.

Kinguaassiutitigut kannguttaatsuliorneq eqqugaasunut annertoorujussuarmik kinguneqarsinnaavoq, pingaartumillu meeqqat inuusuttullu akornanni inuunerup sinnerani kingunerlutsitsisarluni.

Kommuneqarfik Sermersooq, Kalaallit Nunaanni Politiit aamma Kalaallit Nunaanni Peqqinnissaqarfik peqatigiillutik kommunimi upalungaarsimatitaqalerput – Kinguaassiuutitigut Atornerluinermut Akiueqatigiinneq – KAA-mik ullumikkut taaneqartartoq.

Kommuneqarfik Sermersooq, peqqinnissaqarfik politiillu meeqqat kinguaassiutitigut kannguttaatsuliorfigineqarsimasut paarinissaannik immikkut ittumik akisussaaffeqarput.

”Kannguttaatsuliortoqarsimanera paasineqaraangat suliaq aallartinneqartarpoq, taannalu meeqqanut amerlasuunut aamma imaannaanngissinnaasarpoq. Nalaataqarsimaneq inunnut assigiinngitsorpassuarnut oqaluttuarisaqattaassallugu sakkortusinnaavoq, suliallu imminermut tunngasup suliarineqarnerani utaqqineq kiisalu pisariaqartitamik ikiorneqarnissap utaqqinerani atuarnermi meeqqerivimmiinnermilu ulluinnaat ingerlateqqinnissaat imaannaanngissinnaalluni,” Avaaraq Olsen, Kommuneqarfik Sermersuumi Meeqqanut Ilaqutariinnullu Ataatsimiititami siulittaasuusoq oqarpoq.

Susussaqartut akornanni suleqatigiinneq
Nuummi kinguaassiutitigut kannguttaatsuliorfigineqarsimasunut tunngasunik suliaqarnermi misissuineq periusissiornerlu suleqatigiilluni ingerlanneqarsimavoq, tamatumalu kingorna kommunip sinneranut atuutilersinneqassalluni. Periusissiaqarneq kannguttaatsuliorfigineqarsimasunut tunngasunik suliaqarnermi ataqatigiissaarinissamut qulakkeerutaassaaq kiisalu meeraq pilertornerusumik pitsaanerusumillu ikiorneqarsinnaalissalluni.

Jesper Olesenip Sermersuumi immikkoortumi nakorsaanerusup suleqatigiinneq pisariaqarluinnartutut isigaa: ”Ajuusaarnaraluartumik pisariaqalersimasoq pillugu suleqatigiissinnaanerput nuannaarutigaarput. Suleqataasut tamarmik pimoorussilluinnarnerat malunnarluinnarpoq. Taamaammat suleqatigiinnissamut isumalluartorujussuuvugut”

Sullissisutut, ilinniartitsisutut, perorsaasutut, peqqissaavimmi sulisutut politiitulluunniit sulineq apeqqutaatinnagu maanna nutaamik ataatsimoorussamillu iliuusissatut ilitsersuummik peqartoqalerpoq. Tassani atuarneqarsinnaavoq, meeqqamut tunngatillugu aamma aalajangiisussaatitasunut allanut tunngatillugu qanoq iliortoqassanersoq. Tassanili pingaarnerpaatinneqarluni, meeqqap qitiutinneqarnissaa aamma oqartussat suliamillu suliallit meeqqamut ajunnginneq pillugu suleqatigiinnissaat.

Kommunimi tamarmi atuutilersinneqassaaq
”Politiini kannguttaatsuliortarnermut tunngasunik suliaqarfimmik immikkoortortaliornikuuvugut, tassani Nuna tamakkerlugu kaannguttaatsuliornerit pillugit suliarineqarit ingerlanneqartarput, tamakkuninngalu suliaqarnitsinnut una suleqatigiinneq annertuumik alloriarnertut isigaarput. Piginnaasaqarfitsinniillu allaanerusunik piginnaasalinnik suleqateqalerneq qularinngilluinnarparput pitsaanerusumik angusaqarfiussasoq”, vicepolitiinspektøri Jan Lambertsen oqarpoq.

Taamatullu aamma Meeqqanut Ilaqutariinnullu Ingerlatsivimmi pisortaq Martha Lund Olsen suleqatigiilernissamut isumalluarpoq.

”Iliuuseqartussanit assigiinngitsunit iliuusissatut ilitsersuut ilisimaneqalerniassammat sulisunik ukiamut immikkut ittumik sammisaqartitsinissaq pilersaarutigaarput” pisortaq Martha Lund Olsen oqarpoq.

Siunertaavoq, Kommuneqarfik Sermersuumi illoqarfiit tamarmik kannguttaatsuliorfiginnittarnermut tunngasunik sulianut upalungaarsimalluartunik peqanissaq. Nuummi ukiap ingerlanerani iliuuseqartussat attuumassuteqartut tamanut immikkut ittumik sammisaqartinneqassapput. Alloriarnermi tulliussalluni Tasiilami upalungaarsimasuutinneqareersunik nutarterineq pitsanngorsaanerlu.

Kommuneqarfik Sermersooq, Kalaallit Nunaanni Politiit aamma Kalaallit Nunaanni Peqqinnissaqarfik iliuusissatut pilersaaruteqalerneq tulluusimaarutigaat. Akunnerminni suliassanik ilisimaarinninnerulerneq, nukittuffigisanik unammilligassatigullu akaareqatigiinnerulerneq kiisalu isumaqatigiilluni ataatsimoorussamik siunnerfeqalerneq pineqartut – soorunami meeqqat eqqarsaatigalugit angusaqarfiulluassapput.

  • Jan Lambertsen, Vicepolitiinspektør og Linjechef for Efterforskning, Grønlands Politi
  • Jesper Olesen, Ledende regionslæge, DIS
  • Ellen Magnussen, Fagchef for foranstaltningsområdet, Forvaltning for Børn og Familie
  • Christina Johansen Forvaltning for Børn og Familie
  • Ella Skifte, chefsygeplejerske i Det Grønlandske Sundhedsvæsen samt konstitueret Direktør i Styrelsen for Sundhed og Forebyggelse
  • Martha Lund Olsen, Direktør, Forvaltning for Børn og Familie
  • Riikki Grønvold, Fagchef for skoleområdet