Services

Unnuarissat Paamiuni aallartipput

Kommuneqarfik Sermersooq aamma Unnuarissat sumiiffimmi toqqissisimanerulernissaq, pingaartumik meeqqat inuusuttullu akornanni, anguniarlugu suleqatigiilerput.

”Paamiuni assut tigulluarneqarpugut. Suliniutigineqartoq inunnit assut nuannaarutigineqarpoq inussiarnisaarnerlu tamanna nuannersuuvoq”, pitsaaliuinermik siunnersorti Augustine Rosing, Paamiuni Meeqqanut Ilaqutariinnullu ingerlatsivimmeersoq oqarpoq.

”Pineqartoq tamanna Paamiuni Pitsaaliuinermik ataatsimiititamit ukioq kingulleq eqqartorneqarpoq. Meeqqat inuusuttullu pillugit suliniutit arlaqarnerusut pisariaqartinneqartut isumaqarpugut taamaattumillu maannangaaq Unnuarissat aallartissinnaaleratsigit nuannersuuvoq. Kommune ininik atukkiussivoq Unnuarissaniillu Nuummiit jakkinik pissarsisimapput.

Unnuarissat tassaapput namminneq piumassutsiminnik peqatigiillutik ingerlatsisut, inersimasut aqqusinerni takussaasut. Unnuarissat paarsisuunngillat aamma politiinut attuumassuteqanngillat.

”Paamiuni Unnuarissat qaammatit qiteqqunnerini tallimanngornerni unnukkut aamma qaammatit naanerini sapaatip akunnerani kingullermi tallimanngornermi arfininngornermilu aqqusinerni angalaartarput. Illoqarfimmi angalaartarput nal. 21:00-miit 24:00-mut. Angalaaqatigiit marlukkuutaanngikkunik sisamakkuutaartarput. Ajornanngikkaangat angalaaqatigiit arnartaqarlutillu  angutitaqartarput. Unnuarissat assigiinnik ilisarnartunik sungaartunik jakkeqartuaannarput”, Augustine Rosing oqarpoq.

Borgmesterip Charlotte Ludvigsenip suliniut nuannaarutigivaa.

”Meeqqat inuusuttullu aneeraangamik toqqissisimasussaapput taamaattumillu Unnuarissat Paamiuni aallartinnerat ilumut nuannersuuvoq. Suliniuteqarnerat assorsuaq iluaqutaavoq. Unnuarissat toqqissisimatitsiinnaratik aamma isumassuiinnaaratik aamma pinaveersaartitsinermik pilersitseqataapput. Kommuneqarfik Sermersuumut pissusissamisuuginnarpoq suliniutigineqartup pitsaasup tapersersorneqarnissaa Unnuarissanilu piumassutsiminnik ingerlatsisunut qujanaq”, Charlotte Ludvigsen oqarpoq.