Services

Tasiilami innuttaasut tusaaniarpavut

Kommuneqarfik Sermersuumi Aningaasaqarnermut Inuussutissarsiornermullu Ataatsimiititami ilaasortat sapaatip-akunnera kingulleq Tasiilamut nunaqarfiinullu angalapput ilaatigullu innuttaasut inuussutissarsiortullu ataatsimeeqatigalugit.

”Tasiilami imigassat tuniniagaanerisa matuneqarnissaannut noqqaassuteqarnissaq sioqqullugu angalanissarput pilersaarutaareerpoq. Aaqqiinerungallarpoq, nalunngilarpullu ullut ikittuinnaat ingerlaneranni ajornartorsiut aaqqinneqarnavianngitsoq. Ataatsimiititamiit pingaartipparput innuttaasut qanimut akuutinneqarnissaat ataatsimoorlutalu aaqqiissutissanik nassaassasugut, siunissaq qanittoq ungasissiorlu eqqarsaatigalugu.

Najukkami innuttaasut ataatsimiititamit qanimut oqaloqatigineqarput aalajangeeqataasinnaanerunerlu kissaatigaat. Najukkami innuttaasut qanilaarnerannut tatiginninnerannullu qujavugut. Najukkami piginnaasat pigineqartut atorneqartussaapput. Pissusissamisuuginnarpoq taakkumi pissutsit ilisimaarimmatigit aamma suut iluatsinnersut suullu iluatsinnginnersut nalunnginnamikkit.

Tasiilaq periarfissarpassuaqarpoq, aamma ilinniartitaanerup tungaatigut taamaammat periarfissat assigiinngitsut suunersut misissornissaat aallartittariaqarpoq. Tasiilami inuussutissarsiutit inerisartariaqarlutillu suliffeqarfiit pilersittariaqarput.

Tasiilaq annertuumik ukkatariuarparput siunissarlu ungasinnerusoq eqqarsaatigalugu inissiat sanaartorneqarnissaat pilersaarutaavoq. Sanaartorfissagissaaneq aallartereerpoq ukiullu qulit tulliuttut ingerlanerini inissiat 10-15-illu akornanni ukiut tamaasa sananeqarnissaat naatsorsuutigineqarsinnaapput.

Isumassarsialli allat najukkami innuttaasuneertariaqarput”.

Tasiilami Najukkami Ataatsimiititaliaq ullumi marlunngornermi septembarip ulluisa 14-ianni Tasiilaq – massakkut siunissamilu qulequtaralugu innuttaasunik ataatsimiititsinissamut aggersaavoq.

”Suliniutitsialassuuvoq tamakkiisumik tapersersugarput. Innuttaasut aalajangiisuussasut pingaaruteqartuuvoq. Najukkami innuttaasut taakkuupput siunissaq pillugu takorluukkanik, piviusunngortikkusutanik kissaatinillu oqariartuuteqartariaqartut. Tusarnaarpugut aamma kissaatit piviusunngortinnissaannut peqataassaagut.

Kikkulluunniit inuuneq naleqartuutikkusuppaat. Ullaakkut makilluni qilanaarisaqarnissaq kikkunnilluunniit angorusunneqarpoq. Aamma meeqqat pitsaanerpaanik najoqqutassaqartinneqarnissaat tamanit anguneqarusuppoq.

Tasiilami innuttaasut sunik kissaateqarpat? Sunik anguniagaqarusuppat? Meeqqat, inuusuttut aamma utoqqaat pillugit qanoq ittunik takorluugaqarpat?

Suliniutit tapersersorusuppavut aamma marlunngornermi ataatsimeeqatigiinnermiit suut anguneqarsimanersut tusassallugit qilanaarpugut.

Kissaatit kommunalbestyrelsimut anngunneqarnissaannut aningaasaliissutissanillu pisarialinnik ikiuunnissamut Aningaasaqarnermut Inuussutissarsiornermullu Ataatsimiititaq piareersimavoq.

Sapaatip-akunnerini marlunni imigassat tuniniaqqusaannginneranni Tasiilami eqqaanilu inoqarfinni tamani allaffeqarfik sammisassarpassuarnik tapersersukkatsinnik politikkikkullu qanimut malinnaaffigisatsinnik pilersaaruteqarfiuvoq.”

Inussiarnersumik inuulluaqqusilluta

Aningaasaqarnermut Inuussutissarsiornermullu Ataatsimiititamut ilaasortat: Charlotte Ludvigsen, Juaaka Lyberth, Uju Petersen, Justus Hansen, Ken Madsen, Inga Dóra G. Markussen kiisalu Martha Abelsen.