Aqqusinerni putunik aqquserngillu sinaakkutaanik iluarsaassineq kiisalu allagartalersuinerit Paamiuni aallartinneqartut ilagiinnarpaat.
Maannakkut Paamiuni Materialgårdenimi pilersaaruterpassuit isumaginissaanut eqqumaffigisassat pillugit assut ulappupput. “Maanna Paamiuni aqquserngit putui iluarsaappagut, tassungalu Nuummiit asfaltinut atortoq, asfaltfræs, pissarsiarisimasarput atorparput. Kingorna aqquserngit sinaakkutai aqquserngillu allagartaat nutaat suliaralugit aallartissaagut”, aqqusinilerisut aqutsisuat Peter Jonassen oqarpoq.
Attaveqaatinik iluarsaassinerit taamaattut piareersarluarneqartariaqarput oqartussaaffiillu assigiinngitsut akornanni suleqatigiittoqartariaqarluni. Tamanna Materialegårdenimi pilersaarusiornermut aqutsisup Kresten Heilmannip uppernarsarsinnaavaa. ”Assersuutigalugu sumi allagartat “pinngitsoornani tunuarsimasussaaneq” nivinngarneqassanersut paasiniarlugit annertuumik suliaqarsimavugut, taamaattumik tamatumunnga Paamiuni politiit suleqatigaavut. Aqquserngit sinaakkutaannut tunngatillugu iluarsaattussaavagut kiisalu aqquserngit sinaakkutaasa aallartinneranni naanerannilu aputaajaanissamut nalunaaqutsersuisussaalluta – tassunga ilanngullugu aqquserngit sinaakkutaanni nutaatut aputaajaanissamut nalunaaqutsersuisussaalluta”, oqaatigaa nangillunilu tamanna Sisimiunit isumassarsiaasoq.
Ukiup aallartinnerani Paamiuni kussinerit salinneqarnissaat pillugu Materielgården annertuumik suliniuteqarpoq. Tassunga atatillugu Materielgårdenimi aqutsisoq Jan Rosing oqarpoq “Illoqarfimmi kussinerit sumiinneri nunap assinganut nalunaaqutsersorlugit nutaatut suliniuteqarpugut. Taamaalilluta kussinerit sorliit salereernerlugit taavalu sorlernut Betoncentralenimit ikiorneqartariaqarnerluta tamakkiisumik nakkutigisinnaavarput. Saniatigut aqqusinerni kussinerit tamaasa ukioq manna naammassisinnaanagit takusinnaavarput, taava aappaagu taakku pissavagut, erseqqissaatigissavaralu ukioq manna pingaarnerit angumerissagatsigit”.
Naggasiullugu Peter Jonassenip erseqqissaatigaa, Paamiuni pitsaanerpaamik attaveqaatit aserfallatsaaliornissaanut Materialgårdenimi sulisut ataatsimoorlutik sulinissaat pisariaqassasoq. Assersuutitut taavaa aqquserngit putuinik iluarsaassinermi kikkut tamarmik peqataasariaqartut, tamannalu maanna ingerlalluartoq.
Paamiuni Sanarfinermut Avatangiisinullu Ingerlatsiviup Immikkoortuani aqutsisup Kennerth Hjorthip Paamiuni attaveqaatit ataavartumik Materielgårdenimit iluarsartuunneqarnerat assut iluarisimaarlugu oqaatigaa.