Illoqarfiit pingaarnersaanni innuttaasut amerliartuaarput, maannakkullu 19.000-inik amerlassuseqalerlutik.
“Tamannalu soorunami nalliussineqassaaq malunnartinniarneqarlunilu” borgmesteri Charlotte Ludvigsen oqarpoq.
Malunnartitsinissaq ullumi arfininngornermi ingerlanneqassaaq nal. 11 Brugsenip silataani, tassanilu Kaaleeraq M Andersen tusarnaartitsissaaq, kissartumillu kakaoqassaaq.
“Ineriartorneq tamanna pitsaasuuvoq. Nuuk alliartorpoq, innuttaasullu amerliartortut tamaanga nuuttarput, sulisariaqarnitsinnik takussutissiimmat suli amerlanerusunik inissialiortitertariaqarpugut, ilinniarfeqarfiit nukittorsassavagut, inuussutissarsiorfiit inerititaqarnerulersillugit, aalisarnermik inuussutissarsiornerup iluani qitiusumik inissisimanerput nukittorsarneqassaaq, takornariaqarnerlu ineriartortitsiffiussalluni. Nuuk illoqarfittut anginerusutut nukittunerusutullu aamma 2030-mi 30.000-inik innuttaqartussatut ineriartortinnissaa siunertaavoq”.
Maani innuttaasut tamarmik pingaaruteqarput, meeraagunik, inuusuttuugunik, inersimasuugunik utoqqaagunillu. Tassami innuttaasut tamarmik immikkut Nuuk ilusilersueqataaffigaat. Innuttaasut tamarmik Nuuk immikkuullarissunngorteqataaffigivaat, nuannersumillu inuuffigineqarsinnaasunngortinneranut peqataallutik”, Charlotte Ludvigsen oqarpoq.