Services

NNK21 – Kajumissutsimik suleqataanissamut soqutiginnittoqarluartoq

Ataasinngornermi aggustip 30-ani kajumissutsimik Nuuk Nordisk Kulturfestivalimut suleqataarusuttunut saqqummiisoqarpoq, innuttaasullu suleqataanissaminnut soqutiginnillutik orniguttut amerlapput, aaqqissuisut naatsorsuutaanniit amerlanerungaatsiarlutik.

Aaqqissuussap aallartinngilaattaani inuit kajumissusertik atorlugu suleqataanissaminnik soqutiginnittut tusarnaariartut qulit sinnilaarpaat, saqqummiinerlu aallarteruttortut inuit 20-it missaaniittut ataatsikkut isaalerput. Inuit orniguttut inuusuttut, ilinniartut kiisalu inersimanerusut takkuttuupput. Aaqqissuussaq qiimanartumik ingerlanneqarpoq, illalaarnissamut inissaqartitsisoqarluni – aamma saqqummiinerup nalaani.

”Tamassi tikilluaritsi, øøh, utoqqatserpunga takkuttusi amerlanaarlusi tupaqqalaarama!” aaqqissuisut Kuluk Helms aamma Maannguaq Rosing saqqummiissallutik aallartinniarnerat takkuttut amerlanaarnerannit ajornakusoortitsilaaraluartoq, qiimallutik saqqummiussassartik kalaallisut danskisullu saqqummiuppaat.

Tamanut inissaqarpoq

Aaqqissuisut saqqummeereermata orniguttut apeqquteqarnissaat periarfissiissutigineqarpoq. Apeqquterpassuit apeqqutigineqarput, aaqqissuisut tunuliaqutaat pillugit, suleqataanissamut paasissutissanut tunngasut ilaatigullu suleqataanissami piffissat naleqqussarneqarsinnaaneranut tunngasut, assersuutigalu ilinniartuugaanni.

Elvira Kuitse tusarnaariartunut ilaavoq.

”Kulturfestivalimi annertuumi suleqataanissara aammalu inunnik nutaanik naapitsinissara nuannarisuugakku soqutiginnillunga tusarnaariarpunga”, Elvira Kuitse inatsisilerituunngorniaq taama oqarpoq.

Elvira Kuitse aaqqissuussani allani eqqumiitsuliortut peqataasarnikuuvoq, kisianni ”illuatungaani” kajumissuseq atorlugu aaqqissuussami angisuumi, soorlu Nuuk Nordisk Kulturfestivalitut ittumi ikiutaaneq misilinnikuunngilaa, maanna misilikkusulerpaa.

”Inuusuttut allat aamma kajumissuseq atorlugu suleqataanissaannut kaammattuerusuppunga. Uanga nammineerlunga ikinngutikka kaammattorpakka, misigisassat nuannersut misigisussaavagut, aamma nukigut festivalimi suleqataanitsigut misilittarsinnaavagut”, Elvira Kuitse taama oqarpoq.

Maanna nammineq kajumissuseq atorlugu ikiortaarusuttunut unnussiuaartitsinerit pingasut ingerlanneqarsimalerput, aaqqissuussani siullerni inuit marluk sisamallu akornaniissimapput. Ataasinngormalli amerleriarujussuarput, tassa inuit takkuttut 30 angugamikkit. Septemberip 29-ani suleqataarusuttunut unnussiuaartitsisoqaqqikkumaarpoq.