Nipilersornermik Ilinniarfiup meeqqerivimmiuaqqanut nipilersornermik ilinniartitsineq ingerlateqqippaat – meeqqat aallarteqqinnissaq pileriginikooqaat.
Meeqqerivimmiunut nipilersornermik ilinniartitsineq 2019-mi aallartinneqarpoq, Nipilersornermik Ilinniarfik malugilermagu ilaqutariit nukittunerit, ilaqutariit allaniit aaqqissuussani ilaanerusartut. Taamaammat nipilersonermik ilinniartitsineq pilersaarutigineqarpoq, meeqqat tamarmik, tunuliaqutaat apeqqutaatinnagit, iluaqqutigalugu peqataasinnaaniassammata.
“Aamma aaqqissuussariginikuusatsinni inissaaruttarnikuugatta allamik pilersaarusiornikuuvugut. Ilinniartitsinerlu una atorlugu, meeqqat amerlanerit ilanngussinnaanissaannut periarfisseeqqinneruvoq”, Nipilersornermik Ilinniarfiup pisortaata, Pipaluk Lynge Berthelsen oqaatigaa.
Nipilersornermik Ilinniarfiup neriuutigaa, meeqqat nipilersornerup tungaatigut soqutiginnissusaat siunissami pigiinnassagaat. Atuartitsinerullu ingerlanerani nammineq nipeqartutut, tusaaneqartutullu misigisinnaanissaat, nipilersuullu meeqqat perioriartorneranni iluaqqutigisinnaanissaat ilinniarfiup neriuutigaa.
“Pilersitap siunertaraa, meeqqat mikineraniit nipilersorneq nunarsuaata takutinnissaa. Nipilersorneq ineriartornermut ilinniarnermullu sakkuulluartuuvoq. Meeqqat immikkut ataatsimullu ineriartornissaannut iluaqutaalluartarmat. Aallartikkattali meeqqerivimmiuaqqaniit sulisuniillu kissalaartumik tikilluaqqusaanikuuvugut”, Pipaluk oqarpoq.
Atuartitsinerit siulliit meeqqeriviit Nukami Puiarmilu sapaatip akunnerata siuliani aallartipput, decembarillu tungaanut ingerlanneqarttussaallutik. Ukiup tulliani februarimiit apriilip tungaanut Nipilersornermik Ilinniarfiup meeqqeriviit Apisseq Soralullu ilinniartissavaat.