Services

Katikkusuppinga?

Aap! Ukioq kingulleq Nuummi aappariit 72-it pisortanit katitinneqarnerminnut atatillugu imminnut angerfigeqatigiissallutik aalajangerput.

”Katititsilluni suliaq nuannersuuvoq. Inuit nuannaartaqaat misigissuserlu pitsaasuulluni”, Lone Rosengreen Pedersen oqarpoq. Innuttaasunik Sullissivimmi pisortaavoq Inuit Ataqatigiinnilu Kommunalbestyrelsimut ilaasortaalluni ilutigalugu 2017-imiit katititsisinnaalluni.

”Siusinnerusumut naleqqiullugu ukioq kingulleq innuttaasut katinniarlutik saaffiginnittut amerlanerupput. 2018-imi 50-it, 2019 48-t aamma 2020-mi 72-it katitinneqarput. Assigiinngissutaavoq annertuvoq naluaralu suna pissutaanersoq.

Katitinneqarusukkaanni siullermik katinnermut nalunaarut immersorneqaqqaartarpoq. Tassani apeqqutit ilai akineqartarput soorlu siusinnerusukkut katisimanikuuneq, katereernerup kingorna kinguliaq pigiinnarusunnerlugu il.il. 

”Pingasunngornikkut tallimanngornikkullu katititsisarpugut. Katititsinerit amerlanersaat kommunalbestyrelsip ataatsimiittarfiani ingerlanneqartarput kisianni aamma ilaatigut allami katititsisarpugut. Illoqarfimmi sumiiffiit assigiinngitsut soorlu sissaq, Ilisimatusarfitoqaq, Qallussuaq, Dronning Ingridip Napparsimavissua aamma kangerluup ilua misilereerpakka. Piffissap ilaa aamma Tatsip Ataani katittoqarpoq. Sumiiffik misigissutsinut tunngasumik oqaluttuassartaqarpoq. Aappariit Tatsip Ataani katissallutik aalajangerpaat, tassani siullerpaamik kuneqqaarsimagamik. Inuit kissaataat tusaaniartarpagut”, Lone Rosengreen Pedersen oqarpoq.

Kommuneqarfik Sermersuumi Borgmester Charlotte Ludvigsen kiisalu kommunalbestyrelsimi ilaasortat tamarmik katititsisinnaapput.