Filmiliortartoq Marc Fussing Rosbach Kommuneqarfik Sermersuumik Kulturimik Nittarsaassisussatut ippassaq toqqarneqarpoq. Tamanna pivoq ikinngutai aammalu ilaqutai aaqqissuussinermi peqatigalugit.
”Kommuneqarfik Sermersuumut qujarusuppunga Kulturimik Nittarsaassisussatut toqqarsimammannga, tamanna uannut isumaqartorujussuuvoq. Qilanaarpunga. Ilaqutannut, ikinngutinnut suleqatinullu qujarusuppunga, maanga killinnissannut ikiuuttarsimammata. Massakkut sakkussaqarluarpunga, attavippassuarnik peqarpunga, aamma nunatta avataani. Taamaammat piffissaq torrannerusinnaanngilaq”, Kulturimik Nittarsaassisunngortoq Marc Fussing Rosbach taama oqarpoq.
Marc Fussing Rosbach 26-innarnik ukioqaraluarlu eqqumiitsuliortutut suliarpassuaqalereerpoq. Suliffeqarfik nammineq pilersissimasamini, FUROS IMAGE-mi pisortaavoq, filmit marluk; Akornatsinniittut – Taratta Nunaanni aammalu Kiinappalik suliarinikuuai. Taakku saniatigut musikvidoet arlallit, filmit naatsut suliarisimavai filminilu allani suleqataasarsimavoq, soorlu piviusulersaarummi White Paperimi.
Kommuneqarfik Sermersuumi Kulturi siuarsanissaa pillugu Siunnersuisoqatigiit ukiut tamaasa Kulturimik Nittarsaassisussamik toqqaasarpoq. Borgmesteri Charlotte Ludvigsen, Marc Fussing Rosbach toqqarneqarneranut ima tunngavilersuivoq.
”Assorsuaq nuannaarutigivara Kulturimik siuarsaaneq pillugu Siunnersuisoqatigiinnit Kommuneqarfik Sermersuumi Marc Fussing Rosbach kulturimik nittarsaassisutut nutaatut toqqarneqarsinnaammat. Sinnattut piviusunngorsinnaasut uppernarsisippat. Angusaqarusussuseqaraanni sumorsuaq pisoqarsinnaasoq uppernarsisippat”, borgmesteri Charlotte Ludvigsen oqalugiarnermi taama oqarpoq.
Marc Fussing Rosbach nersornaatinik tusaamaneqarluartunik marlunnik pissarsereernikuuvoq, Innersuaq Nuuk International Film Festivalimi tunniunneqartartoq kiisalu Namminersorlutik Oqartussat kulturikkut malunnaateqalersimasumut kajumissaasiuttagaa, tamarmik 2018-imi pissarsiarisimallugit.
Aaqqissuussinermi Pele Møller ilanilu nipilersorlutik tusarnaartitsipput, aamma Marcip suleqataa kammalaataalu Malik Kleist kiisalu Marcip aappaa Paninnguaq Lind Jensen oqalugiarput. Inuit 30-t missaaniittut peqataapput, aaqqissuussarlu Facebookikkut toqqaannartumik aallakaatinneqarluni.
Aallakaatinneqartut ugguuna takusinnaavat
