Tasiilami ulluni kingullerni amiilaarnartunik arlalinnik pisoqarsimavoq. Illoqarfimmi angerlarsimaffinni 15-inik eqqissiviilliortoqarsimavoq, marlunnik imminut toquttoqarluni, sisamanik imminut toqunnissamik sioorasaarisoqarluni, arfinilinnillu nakuusertoqarluni. Taamaattumik Peqqinnissaqarfimmit saaffiginnissuteqartoqarnerata kingorna tallimanngornermi kommunalbestyrelsip Tasiilami nunaqarfiinilu imigassamik aalakoornartulimmik tuniniaanerup matuneqarnissaa Naalakkersuisunut qinnuteqaatigissallugu aalajangerpaa.
”Pisoq assut alianarpoq, inerteqquteqarnerlu utaqqiisaasumik tamatuminnga unitsitsisinnaasoq soorunami tapersersorparput. Inuit amerlasuut ullualunnguani kingullerni inuttut nalaataat tusarlugit assut annernarpoq, taamaattumik aalajangiineq eqqortuusoq qularutiginngilara.” Kommuneqarfik Sermersuumi borgmesteri Charlotte Ludvigsen oqarpoq.
Kommunalbestyrelse ataatsimoorluni imigassamik aalakoornartulimmik tuniniaanerup unitsinneqarnissaanut qinnuteqarpoq. Tamanna naak kommunalbestyrelse siusinnerusukkut najukkani inerteqquteqarnernik annertuumik isornartorsiuisarsimagaluartoq pivoq.
”Innuttaasunit akisussaaffimmik arsaarinerup pitsaasumik kinguneqarnissaa ataatsimut isigalugu ilimaginngilara, kisianni uani pisumi utaqqiisaasumik inerteqquteqarneq eqqortumik aaqqiissutaasoraara”, Charlotte Ludvigsen oqarpoq.
Ukiuni kingullerni Tasiilami isumaginninnermi suliniutit nutaat amerlasuut aallartinneqarsimapput. Illoqarfimmi ilaatigut ilaqutariinnik katsorsaanissamik neqerooruteqalersimavoq, inuusuttunillu sullissiveqalerluni, borgmesterilli suli annertunerusumik suliniuteqartoqartariaqartoq nassuerutigaa.
”Ingerlatsivipput sakkortuumik nalaataqarnermi ikiuigasuartarnermut neqeroorusioqqullugu qinnuigaara, inuillu eqqugaasut ataatsimoortinniarlugit pisinnaasarput tamaat atorlugu sulissuteqarnissarput pingaaruteqartoq isumaqarpunga. Taamatuttaaq ulluni 14-ini tulliuttuni innuttaasut ataatsimoorfigisinnaasaannik amerlasuunik imigassartaqanngitsunik sammisassaqartitsisoqarnissaa qinnutigaara. Ilaatigut tusarnaartitsisoqarsinnaavoq sumiissusersiorluniluunniit arpatsitsisoqarluni.
Siunissaq ungasinnerusoq eqqarsaatigalugu, ingerlatsivik isumaginninnikkut ajornartorsiutinik isumaginnittussamik Tasiilaq pillugu tamakkiisumik pilersaarusiornissaanik qinnuigaara”, Charlotte Ludvigsen oqarpoq.