Services

Atuartoq tunillatsissimasoq paasineqartoq: USK-imi atuaqatigiit angerlartinneqartut aamma Narsarmiutaq matuvoq

USK-imi atuartoq ataaseq Coronavirusimik tunillatsissimasoq paasineqarpoq. Atuartup atuaqatai angerlartinneqarput aammalu angajoqqaat meeqqatik misissorteqqullugit kaammattorneqarlutik. Atuartoq tunillatsissimasoq napparsimasimanngilaq ersiuteqarsimananiluunniit.

”Atuartitsinerup nanginneqarnissaa isumannaatsutut isummerfigaarput, tunillatsissimasoq qanillisimasaalu angerlarsimaannartussanngormata. Uivilinnginnissarput meeqqallu ulluinnarni inuunerinik allanngortitsilluinnannginnissarput pingaaruteqarpoq”, Kommuneqarfik Sermersuumi Atuarfinnut Pisortaq Riikki Grønvold oqarpoq.

Atuartup tunillatsissimasup aamma sunngiffimmi ornittagaq AKO Narsarmiutaq ornittarpaa. Taamaattumik Narsarmiutaq matugallarneqarpoq, angajoqqaallu kaammattorneqarput meeqqatik misissorteqqullugit.

Ataasinngormat Nuummi ulluunerani paaqqinnittarfimmi kattussiviusumi Timmiaaqqat-mi meeraq ataaseq sulisorlu ataaseq Covid-19-imik tunillatsissimasut paasineqarnerisa kingorna  paaqqinnittarfik suli matoqqavoq.