Services

Atuartoq alla aamma tunillatsittoq – tamatumuuna ASK-imi

Sisamanngornermi misissuinernit atuartoq ataaseq tunillatsisimasoq paasineqarpoq. Tamatumuuna Atuarfik Samuel Kleinschmidtimi atuartoq Coronavirusimik tunillanneqarsimavoq. Atuarfinni pisut kiisalu mattusimanissaq misissortinnissarlu annerusumik uani  paasisaqarfigisinnaavatit.

Atuartup klassiani atuartut angerlartinneqarput, angajoqqaallu tamarmik attavigineqarput ingerlaannarlu meeqqaminnik misissortitsinissaannik kaammattorneqarlutik.

Atuartut angerlartinneqartut tunillatsisimasumik attaveqarnerminniit ulluni arfineq-marlunni tulliuttuni mattusimaannassapput. Tamatumalu kingornatigut ullut arfineq-aappassaani misissorteqqissapput. Atuartut Covid-19-imut ullut arfineq-aappassaanni misissorteqqinnerminni akissutisiaat negativiusimappat aatsaat atualeqqissinnaapput.

Tamanna aamma USK-imi atuartunut angerlartinneqarsimasunut atuuppoq, taakku sapaatip akunnerata aallartinnerani mattusimatinneqalerput. USK-imi atuartut ataasinngornermi ulloq 6. septembari tunillatsissimasumut attaveqarsimapput. Taamaattumik ataasinngornermi septembarip ulluisa 13-ianni misissorteqqinnissamik tungaanut mattusimasussaapput.

AKO-t, ulluunerani paaqqinnittarfiit aamma USK-imi klassit
Atuarfik Samuel Kleinschmidtimut atasoq AKO ILLU isumannaallisaatitut aamma matoqqatinneqarallarpoq.

Taamaalilluni suliniutit tulliuttut atuutsinneqarput:

ASK-imi klassimi ataatsimi atuartut angerlartinneqarput

USK-imi klassit pingasut angerlartinneqarput

AKO Narsarmiutaq matoqqavoq

AKO ILLU matoqqavoq

Meeqqerivik Timmiaaqqat matoqqavoq

ASK-imi klassip angerlartinneqartup aamma AKO ILLU-p saniatigut meeqqat sulisullu USK-imeersut kiisalu ulluunerani paaqqinnittarfinneersut ataasinngorpat misissorteqqinnissaat naatsorsuutigineqarpoq.

Taamaattumik naatsorsuutigineqarpoq USK-imi klassit kiisalu Narsarmiutaq aamma Timmiaaqqat marlunngorpat ulloq 14. septembari ammaqqinneqassasut, tamanna Nunatta Nakorsaaneranit akuerineqassappat.

Mattusimanissamut misissorteqqinnissamullu malittarisassat
– Tunillatsissimasumut qanimut attaveqarsimaguit, oqarasuaatikkut attavigineqassaatit

– Oqarasuaatikkut attavigineqarsimaguit sapinngisamik tuaviornerpaamik misissortikkiartussaatit

– Illit aamma ulluni arfineq-marlunni mattusimassaatit, ullormiit kingullermik tunillatsisimasumut attaveqarninniit.

– Ullut arfineq-aappassaanni misissorteqqissaatit

– Mattusimaneq aatsaat unitsinneqassaaq misissorteqqinninniit akissutisiat negativiuppat

– Meeqqanut angajoqqaat meeqqatik ilagalugit misissortinnissaannik kaammattorneqarput, siullermeernermi aamma misissorteqqinnermi

– Aammattaaq kikkut tamarmik, tunillatsissimanermut ersiuteqarunik, misissortinnissaat kaammattuutigineqarpoq

Qulaani mattusimanissaq misissorteqqinnissarlu pillugit allassimasut, meeqqanut klassini tunillatsissimasortalinnut tamanut atuupput