Kommuneqarfik Sermersuumi kommunalbestyrelse ilimasaareqqaarluni Ukaliusamut nakkutilliiartorpoq.
Atuarfik Ukaliusaq ingerlalluartuusoq nakkutilliiartornermi paasinarsivoq. Atuarfik paarilluarneqarpoq, aamma naak nutaanngitsuugaluartoq.
Atuarfimmi atuartut 438-upput taakkulu klassinut nalinginnaasunut 20-nut kiisalu klassinut immikkut ittunut pingasunut agguataarsimallutik.
3. klassimi aamma 7. klassimi alloriarfinni misilitsinnermi atuartut tuluttut qallunaatullu angusarissaartut matematikimilu siuariartortut paasinarsivoq. Kalaallisulli pitsaavallaanngitsoq takuneqarsinnaavoq.
Soraarummeerlutik atuartut atuareernerup kingorna tamangajammik ilinniarnermik sulinermilluunniit aallartitsipput. Atuartunut ataasiakkaanut tunngatillugu, 10. klassip kingorna atuartut marlussuit suliffeqalersimanngitsut ilinniakkamilluunniit aallartitsisimanngitsut iliuusissanut pilersaarutit ataasiakkaat tigoqqinngitsoorneqarsimapput.
COVID-19 pissutigalugu ukiumi atuarfiusumi 2019-2020-mi inaarutaasumik misilitsitsisoqanngilaq.
Ukaliusap Atuarfiata eqqaani atuartunut 1200-nut inissalimmik nutaamik atuarfissualiortoqarpoq. Atuarfik 2023-mi naammassineqassasoq naatsorsuutigineqarpoq. Tamatumali kinguneranik atuarfiup eqqaa tukappoq atuartullu anitsiarfissaqanngillat.
Ukaliusap eqqaa tamaat sanaartorfiummat atuartut sumiiffimmik anitsiartarfissaannik atuarfimmi siulersuisut ujartuipput. Taamaammallu atuartut blokkit akornanni anitsiartarput. Taamaammat atuarfiup kantiinaa, atuakkanik atorniartarfia, timersortarfia assigisaalu ammarneqassasut atuartut anitsiarnerminni sumiiffissaqarniassammata atuarfiup aqutsisuinit innersuussutigineqarpoq.
Meeqqanut Atuarfeqarnermullu Ataatsimiititami siulittaasoq, Juaaka Lyberth: ”Ukaliusap tungaanit iliuusaat kusanarpoq. Angusarissaarnerat pillugu pilluaqquakka. Ataatsimiititamiit nalunaarusiaq naammagisimaarparput, tassanimi atuarsinnaavarput atuarfik Kalaallit Nunaanni atuarfinni ingerlalluarnerpaat ilaanniittoq. Taamaattorli atuartut iluamik anitsiartarfissaqannginnerat sukkanerpaamik aaqqiivigineqartariaqarpoq”.
