Services

Sermillip stationiani ilisimatusarnermi aqutsisumit atuagaq akimasooq Tasiilap atuarfianut tunissutigineqarpoq

Ukiuni kingullerni 50-ini Bent Hasholt Tasiilap eqqaani Sermillip kangerluani ilisimatusarfimmi aqutsisuusimavoq – maanna oqarpoq ’qujanaq inuulluarisilu’, tamannali pitinnagu Tasiilap atuarfianut atuakkamik akimasuumik tunissuteqarpoq.

Sermillip kangerluani ilisimatusarfimmi ulloq 3. aggusti 2021 puigunaatsuuvoq. Tassami ilisimatusarnermi aqutsisumut Bent Hasholtimut piffissanngorsimavoq iluamik inuulluaqqusinissaq. Hasholt ukioq kingullerli pisortatigoortumik taamaatikkaluarpoq, Coronali pissutaalluni nalliuttorsiutiginissaa ukioq manna pisussanngorlugu nuutinneqarpoq.

Naggataarnersiorluni kaffillernermi Hasholt atuarfiup ukiorpassuarni suleqatigilluarsimaneranut qujalluni tunissuteqarpoq. Tunissut saqqummerpaa, peqatigitillugu nammineq pigisani atuagaq Grønlands Flora, atuarfiup pisortaanit 1972-imi atorsimasani – taannagooq atorallarsimavaa utertinnissaanut piffissaa aalajangigaanngitsumik, taamaattumik atuagaq soraarninngornermini pigiinnarusuppaa.

Hasholtip nammineq atuarfimmut tunissutai tassaapput atuakkat assigiinngitsut faginut tunngasut aamma Kalaallit Nunaat pillugu oqaluttualiat, ilai naqiteqqaagaasut atornikuusullu allallu ullumikkumeersut ass. Kim Leine atuakkiaa ”Profeterne i Evighedsfjorden”. Ukiut 50 ingerlanerini Sermilimmi ilisimatusarfiup atuunnerani Tasiilap atuarfiani atuartunit stationi arlalippassuariarlugu pulaarneqartarsimavoq. Taassuma saniatigut ilisimatusartut arlallit atuarfiliartarsimapput atuartut ilisimatusarfiullu akornanni suleqatigiinnissaq ilikkagaqarnissarlu siuarsarniarlugit.

Ilisimatusarfik 1970-imi pilersinneqarpoq, sermersuup allanngoriartornerata misissornera qitiutillugu aamma hydrologi – imeq pillugu ilisimasat. Hasholt-illu tamakkua ukiuni 50-ingajanni peqataaffigai. Tamassuma saniatigut siusinnerusumi Tasiilami erngup nukinganik atuilernissamut tunngavissaq ineriartortitseqataaffigaa aamma Nuup eqqaani Utoqqarmiut kangerluanni erngup nukinganik nukissiuuteqalernissaq suleqataaffigisimallugu.

Maanna neriuutaalerpoq Københavns Universitet Europami universitetit allat suleqatigalugit ilisimatusarfiup allilernissaa ineriartortinnissaalu stationip suliai ingerlaqqeqqullugit. Sumiiffimmi innuttaasut atuarfimmilu atuartut annerusumik suleqatigineqarnissaat takorloorneqarpoq, aammalu ilisimatusarnerup sumiiffimmi innuttaasunut iluaqutaanissaa kissaatiginaqaluni.

Atuarfiup tungaanit erseqqissarneqarpoq Bent Hasholtimik inuulluaqqusineq ilisimatusarnermi aqutsisumik piviusorsiunngitsumik inuulluaqqusinerusoq tassaasorligooq inuiaqatigiilerinermik ilisimatusartoq akuutitsilluartoq pimoorussisorlu.