Services

Paamiuni nuannanneq: ”Innasiortarfik” tamanit atorneqassaaq

Paamiuni innuttaasut ”Innasiortarfimmik” pitsaalluinnartumik Najukkamik ataatsimiittaminnit tunissutisipput. Aggustusip 20-ani naammassivoq, ullorlu taanna atorluarneqalereerluni.

Timersortarfimmi sulisut aalajangersimasut, Peter Kleist Møller, Jens Ole Jakobsen, timersortarfimmi pisortartik, Kim Jakobsen Jensen, siuttoralugu ”Innasiortarfik” timersortarfiup atuartut aasaanerani atuanngiffeqarneranni matoqqanerani sanavaat.

Iigaq tamanit, meeqqanit inersimasunillu atorneqarsinnaassaaq. Kommunimi Peqqinneq, Sammisassaqartitsineq, Kulturimullu immikkoortortaqarfik, Paamiuni Najukkami ataatsimiititamut atortussat pisiarinissaannut qinnuteqarsimapput akuerineqarlutillu, atortussat 100.000 koruunit sinnerlugit nalillit pisiarinissaannut.

Atortussat majimi tikipput, atuartullu ukiakkut atualernissaannut piareerneqarnissaa siunnerfigineqarluni – tamannalu qujanartumik iluatsippoq.

”Innuttaasut taamatut suliaqarnerput sianiginngilaat, naammassimmallu, Facebookikkut saqqummiunnerani nuannersumik tupaallatsinneqarput. Ammaanermi ulapputtoqarpoq. Inuit pissangapput,” innasiorfimmillu” misileerusuttut amerlapput”, timersortarfimmi pisortaq Kim J. Jensen oqarpoq.

Soqutiginnilluarneq

Ullaakkut inersimasut Majoriaminngaanneersut siulliullutik misiliipput. Ualikkut innuttaasunut tamanut ammarneqarpoq, tallimanngorneq Nuannisarfik aqqutigalugu misilerarneqarsinnaalluni.

“Atuisut ilitsersuuppagut allunaasanillu nakkarnaveeqqutinut tigummeqataalluta. Soqutiginninneq annertoqaaq, nuannanneq, illalaarneq, ullu naallugu malunnarluni”, Kim oqarpoq ingerlaqqillunilu. “Timersortarfimmi pisortatut tulluusimaarutigaara “innasiortarfiup” pissarsiarinissaanut pilersinneqarneranullu peqataagama, Paamiuni nuannersunut sammisassanullu pissanganartunut ilannguppoq”.

Iigaq ulluinnarni suliffeqarfinnit, peqatigiiffinnit, atuarfinnillu atorneqarsinnaavoq, allanillu kikkunnilluunniit tallimanngornermi Nuannisarfimmi atorneqarsinnaassalluni. Maanna sapaatip akunnera iluitsoq atoreeraluartoq soqutigineqarnera suli annertoqaaq.

“Innasiortarfimmi” nutaami atuisussat ilaattut pilersaarutigineqarpoq innasiortartunik peqatigiiffiliornissaq, illoqarfiup politiivisa ilaat taamatut innasiortarnermik misilittagaqartuusoq, taamaattumilu unammisarnerni arlalissuarni Paamiunut tikinnginnermini peqataasaarsimasoq, siuttoralugu.

“Najukkami ataatsimiititaq annertuumik qutsavigaarput, qularinngilluinarparpullu iigaq tamanit atorluarneqassasoq”, Paamiuni kommuunip Peqqinnermut, Sammisassaqartitsinermut, Kulturimullu immikkoortortaani aqutsisuusoq, Kúnak Lorentzen oqarpoq.