Nuummi utoqqaat illuanni nerisarfik sapaatit akunnerini pingasuni nutarterneqareersorlu ullumikkut atoqqaarfissiorneqarpoq. Nerisarfik nutaaq nereqatigiinnermik, viinnisoqatigiinnermik nuannisarnermillu malunnartinneqarpoq.
Utoqqaat utoqqaat illuani najugaqartut pulaartartullu nuannaarlutik, ilaallu festerutinik atikkersorsimallutik nerisarfitsik atoqqaarfissiorpaat, nerisarfiammi sapaatit akunneri kingulliit pingasut iluarsartuunneqarluni matoqqasimavoq. Medea R. Hansen 84-inik ukiulik neriartortut ilagaat, Medea ukiuni kingullerni utoqqaat illuanni pulaallattaasarpoq.
”Nerisarfik iluarsartuunneqareernerata kingorna kialaarnerulerpoq. Iikkat qaqortuinnaasimagaluarput, maannakkulli ikkaat ilaat tunguusamik kialaartumik qalipanneqarsimapput, taamaasilluni uummarinnerulersutullusooq ippoq angerlarsimaffinganerulaalerlunilu. Soorlu tassa angerlarsimaffik”, Medea qungujulluni ini isigiutigalugu oqarpoq.
Angerlarsimaffippalaarnerusoq
Iikkat qalipanneqarnerisa saniatigut igalaat saagui aamma taarserneqarsimapput, aappalaartut oqimaappaseqisut qaamanerusunik taarserneqarsimallutik – taamaasilluni inip qaamanera iluaallassimalluni. Iikkat assilissanik kiisalu plakatinik annikitsumik ilusilersukkanik kusassarneqarsimapput. Siornatigut amerlanernik assinik qanganitsanik nivingasoqarsimagaluarpoq, assilli ilaat Kalaallit Nunaata Katersugaasivianut tunniunneqarsimapput.
Nerisarfik utoqqarniit katersuuttarfittut aammalu sammisaqarfittut atorneqartartartoq angerlarsimaffippalaarnerunissaa kialaarnerunissaalu nutarterneqarneranut pissutaasut, Jakobine Møller, utoqqaat illuanni Teamkoordinartoriusoq oqaluttuarpoq.
Nutarsarneqarnera sulisuniit ajunngisaarnerusoq Medea R. Hansen oqarpoq. ”Malugineqartutut misigititsivoq. Uagut pilluta suliniuteqarnerat nuannerpoq. Sulisut inussiarnernerpaallutillu kialaarnerpaapput naapinnikuusanni – manna uagutsinnut angerlarsimaffippalaarnissaannut sunniuteqarluartuullutik”.
Medea R. Hansen 
