Services

Nuummi meeqqat isigiarsuttut pingasut UEFA Foundation for Children-imit arsanik tunissutisisut

Meeqqanut Ilaqutariinnullu Ingerlatsivik juunip qaammataa aallartimmat UEFA Foundation for Children-imit arsanik pingasunik mikisunik tunissutisivoq. Arsat taakkua arsaaqqanik imaqarput, assakaallutik aalaterneqartillutillu nipeqartartut, meeqqanut tappiitsunut isigiarsuttunullu naleqqulluartut. Nuummilu meeqqat isigiarsuttut pingasut tunissutisipput.

Meeqqanik Innarluutilinnik Sullissisoqatigiit, Meeqqanut Ilaqutariinnullu Ingerlatsivimmeersut, juunip qaammataani UEFA Foundation for Children-imit ”A ball for all” kikkut tamarmik arsartarnissaannut suliniummut, meeqqat tappiitsut isigiarsuttullu meeraqaterpassuatik assigalugit timimikkut aalatitsisarnissaat siunertaralugu, Youthorama NGO-mit aallartinneqartumut tunngasumik arsanik tunissutisipput. Maannakkuugallartoq suliniut nunanut 207-inut apuussimavoq, tamannalu uani atuarsinnaavat.

Arsat taakkua arsaaqqanik imaqarput, assakaallutik aalaterneqartillutillu nipeqartartut. Taamaattumik meeqqat tappiitsut isigiarsuttullu arsat malissinnaavaat, taamaasillutillu arsamik pinnguarnerit assigiinngitsut malinnaaffigisinnaalerlugit.

Nuummi meeqqat Solveig Markussen, Ilasiaq Heinrich aamma Malik Holm Lyberth tunissutinik nuannersunik taakkuninnga tunineqarput. Taakku pingasuullutik isigiarsuttuupput, meeraqatitillu arsaqatigineq ajungajappaat – maannali arsaqatigisalersinnaavaat!

Qujamasunnarlunilu nuannerpoq

”Meeqqanut Ilaqutariinnullu Ingerlatsiviup nuannaarutigisorujussuuaa suleqaterput Ioanna Mavrokefalidou Andersen UEFA Foundation for Children-imut attaveqarsimammat, taannalu aqqutigalugu UEFA-arsanik pingasunik pissarsisimalluni, meeqqanut tappiitsunut isigiarsuttunullu naleqqussakkanik. Meeqqat nuannaarnerat takullugu nuannersorujussuuvoq. Tamatuma takutippaa meeqqanut immikkut pisariaqartitsisunut iluaqusersuutinik eqqortunik pissarsiniarnissaq pingaaruteqarluinnartuusoq”, Meeqqanut Ilaqutariinnullu Ingerlatsivimmi pisortaq, Martha Lund Olsen oqarpoq.

Nalinginnaasumik Meeqqanik innarluutilinnik sullissisoqatigiit angajoqqaanik suleqatinillu allanik attuumassuteqartunik suleqateqarnerusarput meeqqallu tikillugit takuneq ajungajallugit. Meeqqat arsat qujaruteqaat nuannareqalugillu. Aamma tamanna Meeqqanik Innarluutilinnik Sullissisoqatigiit meeqqat arsaqatigileramikkit nuannaajallaataaqaaq.

Tunissutit, meeqqallu inuunerannut nuannaarutissanik tunniusseqataasinnaaneq Meeqqanut Ilaqutariinnullu Ingerlatsiviup qujamasuutigeqai.