Innuttaasunut

Nuuk nunarsuatsinni siullersaalluni illoqarfiit pingaarnersaattut piujuartitsisunngorpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuuk nunarsuatsinni illoqarfiit pingaarnersaanni siullersaalluni  EarthCheck aqqutigalugu piujuartitsineq tunngavigalugu takornariartarfittut  nersorniarneqarluarpoq. Borgmesteri Charlotte Ludvigsenip tamanna naammagisimaarilluinnarpaa.

”Piujuartitsinerup aningaasaqarnikkut, inooqataanikkut, kulturikkut aamma avatangiisitigut qitiutinneqarnissaa pingaartitarilluinnarparput. Tamanna takussutissaqartinniarlugu ukiut marluk sinnerlugit suliaqarpugut, taamaammat taamatut nersorniarneqarnerput nuannaarutigilluinnarpara. Tamanna pikkorilluinnartunik sulisoqarsimanngippat, inuussutissarsiornikkut siumukarfiusimanngikkaluarpat innuttaasullu pimoorussisimanngikkaluarpata pisinnaasimassanngikkaluarpoq. Tamassinnut qujanarujussuaq”, borgmesteri tulluusimaaqisoq oqarpoq.

Sermersooq Business annertuumik tapiissuteqarsimasut peqatigalugit ”Green Team”-imi ataatsimoorfeqarput, ukuusut Nukissiorfiit, Kommuneqarfik Sermersuumi Avatangiisinut tunngasunik Immikkoortortaqarfik, Kalaallit Nunaanni Naatsorsueqqissaartarfik, Visit Greenland, Nuuk Water Taxi aamma Greenland Escape.

”Takornariartarfiit piujuartitsinermik tunngaveqartut nunat tamalaat akornanni piumaneqarluartuupput, taamaalillunilu Nuuk tikissallugu orniginarluinnartunngortinneqarpoq, takornariat tikittartut amerlanerulissapput, taamaalillunilu takornarialerisunut aningaasaqarnikkut iluaqutaasussaalluni”, Inuussutissarsiornermut pisortaq Emil Skjervedal oqarpoq.

Stewart Moore,EarthCheck-imik pilersitsisoq aamma CEO, inuit najugaqarfissat ornitassatullu – piujuartitsinermillu tunngaveqartut – orniginartittagaat nalaatsornerinnakkut pinngorneq ajortoqarpoq: Innuttaasuniimmi inuussutissarsiortuniillu takorluugalinnit tunniusimasunillu pinngortuupput.

”Nuummi suleqatigiit tamaasa ingerlataannik pilluaqqorusuppakka. Nuuk tassaavoq nunarsuatsinni takornariarfissanut ilaasoq nalissaqanngitsoq, allaanerusumillu iliornissamut sapiissuseqarfiusoq. Takornariartarfittut piujuartitsineq anguniarlugu suleqatigiinnissaq, aalajangersinnaassuseqarnissaq aamma ornitassat akornanni aaqqissuulluakkamik pilersaarusiorsinnaanissaq pisariaqarput,” Stewart Moore oqarpoq. ”Illoqarfiit pingaarnersaat Nuuk nunarsuatsinni ornitassani assissaqanngitsuni ataatsimut isiginnissinnaassuseqartumik aaqqissuussaasumillu aallaaveqarluni ornitassanut tunngasunik aqutsisinnaasoq pilerisaarusiorsinnaassuseqartorlu siuuttunut ilaalerpoq.”

Siammasissumik nersorneqarneq takornariaqarnikkut ingerlarsorfiulissaaq
Nuummi qasusuillutik takornarialerinermik piujuartitsinerulernissamik suliaqarneq maluginiarneqanngitsuunngilaq. Ilaatigut TIME Magazine-mi suliniut nersualaarneqarpoq, Nuummilu ukiuni makkunani pissanganartut eqqaallugit.

EarthCheckimiillu aallagartalerneqarneq takornariartarfittut piujuartutut maanna tunngavilerneqarpoq.