Services

Isuliffimmi sanaartorfissat sanaartorfigineqanngitsut – imak qinnuteqartoqarsinnaavoq

Isuliffimmi, Qinngutsinniittumi nunaminertanik inuussutissarsiornermut atugassanik qinnuteqarnissamut periarfissaqalerpoq.

Kommune matumuuna inuussutissarsiuteqarfimmi 4B5-1-imi Isuliffik 1000-2000 aamma 3000-4500 m2 missaanik angissusilimmik sanaartorfissamik nalunaarutiginnippoq.

Sanaartorfissat pineqartut 1-10 aamma 26-28, sanaartorfigineqanngitsutut nalunaarutigineqarput.

4B5-1 Isuliffik

Kommunimut pilersaarummut tapiliussami immikkoortoq 4B5-1 Isuliffik pillugu, Qinngutsinni Nuummiittumi Inuussutissarsiuteqarfik – April 2015-imeersumi immikkoortumi suut atuuttuunersut sukumiisumik atuarlugu paasiniarluarnissaa pingaaruteqarpoq.

Kommunimut pilersaarummut tapiliussaq Sanarfinermut Avatangiisinullu Ingerlatsivik aamma Illuutinut Oqartussaqarfik saaffigalugu pissarsiarineqarsinnaavoq, imaluunniit kommunip nittartagaani atuarneqarsinnaavoq

Nunaminertat nalunaarutigineqartut angissusaat naapertorlugit agguataagaapput. Immikkoortut pingasuupput:

A: sanaartorfissani 3, 4 aamma 8, 1.000-1.500 m2 missaanni, sanaartorfissagissaanermi akiliutissat 600.000-800.000 kr.-it missaanniipput

B: sanaartorfissani 1, 2, 7, 9, 10 , 1.500-2.000 m2 missaanni, sanaartorfissagissaanermi akiliutissat 850.000-1.5 mio.kr.-it missaanniipput

C: sanaartorfissani 5, 6, 26, 27, 28, 3.000-4.200 m2 missaanni, sanaartorfissagissaanermi akiliutissat 1.9-2.4 mio.kr.-it missaanniipput

Kommunimut pilersaarummut tapiliussami aalajangersakkanit tigulaakkat:
Immikkoortoq inuussutissarsiuteqarfissatut suliffeqarfissuaqarfittut sannaveqarfittullu, entreprenøreqarfittut uninngatitsiveqarfittullu, garageqarfittut, angallassissutinik suliffeqarfittut, annertuunik niueruteqartarfittut assigisaannillu kiisalu suliareqqaarisarfittut.

Sanaartukkat sanaartorfissagissakkatut naammassisami 10 meteri tikillugu portutigisumi sanaartorneqarsinnaapput. Sanaartorfissat 50 %-it tikillugit sanaartorfiusinnaapput. Nunaminertani inuussutissarsiuteqarfiusuni pinngitsoorani sanaartortoqartussaavoq.

Sanaartorfissagissaaneq
Pingaarnertut sanaartorfissagissaasoqareerpoq, aammalu sanaartorfissagissaanermut 800.000 kr. aamma 2.5 mio. kr. akornata  missaannik akiliuteqartitsisoqassaaq, nunaminertap qanoq annertutiginera apeqqutaatillugu.

Nunaminertamik atugassinneqarumaartussat periusissat nalinginnaasut malissavaat, innersuussutigineqarluni agguaassinermut atatillugu kommunimi nunaminertamik atugassiisarnermut aalajangersakkat aamma sanaartorfissamik inniminniinissamut/nunaminertamik atugassinneqarnissamut tunngasumik nalunaaruteqarneq.

Qinnuteqartut uku eqqumaffigissavaat:

  • Immikkoortut uku pingasut A, B imaluunniit C kisimik qinnuteqaatigineqarsinnaapput.
  • Kinaluunniit inatsisitigut pisinnaatitaasoq, inuit ataasiakkaat, suliffeqarfik, ingerlatseqatigiiffik imaluunniit peqatigiiffik nunaminertamik atugassinneqarnissamik qinnuteqarsinnaavoq, ilaquttatut qanigisap arlalinnik qinnuteqaateqarsinnaannginnera eqqumaffigiuk.
  • Makitsinermi qinnuteqarsinnaatitaasut tamarmik makitsinissamut ataatsimik peqartarnerat  tunngaviusarpoq. Taamaalillunilu katissimallugu aapparisaq, inuk inoqutigiinneersoq, inuit allat qinnuteqaammut tunngatillugu imaluunniit toqqaannartumik attuumassuteqartut – ataatsimoorussamik soqutigisaqaqateqartut, imaluunniit ingerlatseqatigiiffinnut inunnullu ingerlatseqatigiiffimmiittunut – piginnittutut imaluunniit ingerlatseqatigiiffiup aqunneqarneranut ilaasut – allalluunniit ingerlatseqatigiiffimmut taassumaluunniit aqunneqarneranut qanimut attuumassuteqartut makitsinermi peqataatinneqarsinnaanngillat, nunaminertanut ataasiakkaanut ataasiinnarmik qinnuteqaateqartoqarsinnaammat. Aamma suliffeqarfissuarnut tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaaneranut imaluunniit ingerlatseqatigiiffinnut marlunnut ataatsimik pingaarnertut aningasaliisulinnut il.il. immikkut qinnuteqarnissaq inerteqqutaavoq.


Qinnuteqaateqarfissaq qaangiuppat qinnuteqaat ammarneqassaaq, tassanilu malittarisassat eqqortumik malinneqarsimanersut nalilerneqassaaq. Eqqortumik malinneqarsimannginnera paasineqarpat, qinnuteqartoq malittarisassanik unioqqutitsisoq peqataajunnaarsinneqassaaq.

Qinnuteqartoq sanaartorfissami ataasiinnarmi A, B imaluunniit C-mi qinnuteqaateqarsinnaavoq. Qinnuteqaat sanaartorfissanik pingaarnersiorlugit allattukkamik imaqarsinnaavoq, qinnuteqaateqartup pissarsiarerusutaanik, siullertut pingaarnerutitaq allamut tunniunneqarsimatillugu.

Qinnuteqaammut ilanngunneqassapput

  • Sanaartornissamut piviusorsiortumik piffissamik pilersaarusiorneq, nunaminertamik atuinissamut inniminniinermut nunaminertamillu atugassinneqarnermut piffissaritinneqartunik atuuttunik malinnittumik.
  • Pilersaarutip allaaserinera, suut sanaartorneqarusunnersut aammalu siunertaq allaaseralugu aamma/imaluunniit titartagartaa ilanngullugu.
  • Nunaminertamik maannakkorpiaq pisariaqartitsineq aamma nunaminertani inuussutissarsiuteqarfiusuni pissarsiarineqareersuni , ukiuni arfineq-marlunni kingullerni, sanaartornerup pisariaqanngitsumik kinguaattoornertaqanngitsumik ingerlanerata  uppernarsarnera. Qinnuteqaateqartoq nunaminertanik sanaartorfiunngitsunik peqaruni, nunaminertanik sanaartorfiunngitsunik allanik pisariaqartitsineq allaqqunneqarsinnaanngitsumik uppernarsaasiissaaq, aammalu nunaminertani siornatigut atugassiissutaasimasuni sanaartorneq annertuumik kinguarsarneqarsimappat, qinnuteqaatip itigartitsissutiginissaanut ingerlatsivik pisinnaatippoq.
  • Aningaasaliisinnaassuseqarnermik uppernarsaat. Qinnuteqartup sanaartugassatut qinnuteqaatip piviusunngortinnissaanut aningaasatigut periarfissani uppernarsassavai. Aningaaserivik, imaluunniit aningaaserivik alla uppernarsaassaaq, aningaaseriviup imaluunniit aningaaseriviup allap naliliinera naapertorlugu qinnuteqartoq, qinnuteqarnerata nalaani aningaasaqarneranik sukumiisumik nalilersorneqarsimasoq – pisariaqanngitsumik unitsinneqarani – nunaminertami qinnutigineqartumi sanaartornissap piviusunngortinneqarnissaannut periarfissaqartoq. Uppernarsaanermi qinnuteqartup ukiuni arlalinni atorunnaarsinneqarsinnaanngitsumik attartortitsisuunini pillugu aalajaatsumik attartortoqarnera imaluunniit pissutsit tassunga assingusut apeqqutaatinneqassanngillat. Sanaartugassap aningaasalerneqarnissaanut qinnuteqartup nammineq aningaasaqarnera naapertuutissaaq. Aningaaserivik imaluunniit aningaaserivik alla uppernarsaanermini inatsisitigut taamatut pisussaaffeqannginneraasinnaanngilaq – uppernarsaatip tutsuiginassusia eqqarsaatigalugu akiliisinnaassuseqarnermi piumasaqaatit nalinginnaasut naapertorlugit aningaaserivik naliliisussaatitaammat.
  • Qinnuteqaatit taakkuninnga paasissutissanik uppernarsaatinillu imaqartut kisimik akuerineqartussatut ilanngunneqassapput. Qinnuteqaatip tamakkiisuunissaa eqqortumillu paasissutissiinissaq qinnuteqartup akisussaaffigaa. Qinnuteqarfissatut piffissaritinneqartoq qaangiutsinnagu qinnuteqaatit kommunip misissorneq ajorpai.

Qinnuteqaatit tamarmik septembarip qulingiluaanni 2021 sioqqullugu imaluunniit kingusinnerpaamik ulloq taanna nal. unnuap qeqqartinnagu tiguneqarsimasut ataatsikkut tiguneqartutut isigineqassapput. Qinnuteqaatit septembarip qulingiluaanni 2021 unnuap qeqqata kingornatigut tiguneqartut, ilaatinneqassanngillat.

Atugassiinerup ingerlanneqarnera
Piumasarineqartunik naammassinnissimasut akornanni Kommuneqarfik Sermersooq makitsissaaq qinnuteqarnissamut piffissaliussap kingornagut ilimagisamik sapaatip-akunneri ataaseq, marluk tikillugit. Qaqugu makitsisoqassanersoq pillugu qinnuteqartut nalunaarfigineqarumaarput. Makitsineq kikkunnut tamanut ammavoq kommunillu nittartagaatigut facebookikkullu qupperneratigut nalunaarutigineqarumaarluni.

Aammattaaq Kommuneqarfik Sermersuup nunaminertamik atugassiisarnermik nalinginnaasumik aalajangersagai innersuussutigineqarput.

Annertunerusumik paasissutissat Sanarfinermut Avatangiisinullu Ingerlatsivimmut paasiniarneqarsinnaapput, sai@sermersooq.gl

Nunaminertamik inniminniiniarluni qinnuteqaat uunga nassiunneqassaaq, Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk, imaluunniit elektroniskimik uungasai@sermersooq.gl