Aalborgip kommunia Kommuneqarfik Sermersuullu akornanni misileraavimmut tunngasunik suleqatigiinnissamut isumaqatigiinneq ukioq kingulleq atsiorneqarpoq ukiorlu ataaseq qaangiutereersoq suleqatigiinneq annertusarneqarluni.
Borgmester Charlotte Ludvigsenip Kommuneqarfik Sermersuup Aalborgillu kommuniata akornanni suleqatigiinneq misilittakkanillu avitseqatigiinneq qujamasuutigeqaa. Taanna ulluni makkunani Nuummiit aallartitallu Danmarkimiipput “”Aalborgimi Kalaallit Nunaannut ulloqartitsinermut” peqataajartorlutik.
“Qularinngilara Kalaallit Nunaanniit aallartitat mingutsitsinngitsumik nukissiuuteqarneq piujuartitsinerlu pillugit suliaqaqqinnissamut ilisimasanik isumassarsiassanillu nutaanik pissarsiaqarsimallutik utissasut”
”Misileraavik uagutsinnut nalitoqaaq. Kalaallinik Green Hub Denmarkip aaqqissuussaanut ilaasoqarnissaa pingaartinneqarsimavoq. Green Hub nunarsuaq tamakkerlugu mingutsitsissutaanngitsumik ineriartortitsinermik annertuumik pilersitseqataasutut ilisimaneqarpoq. Assersuutitut taasinnaavara Aalborgimi innuttaasut eqqagaannik teknologi pisariusoq atorlugu immikkoortiterisarmata. Kajungerisartunit savimerngit aatseqqitassatut katersorneqartarput atoqqinneqartarlutillu. Taakkua saniatigut pilersaarutinik assigiinngitsunik avatangiisimut iluaqutaasinnaasunik ingerlatsipput.
Nuup nunarsuarmi illoqarfiit pingaarnersaanni siullersaalluni piujuartitsinermut allagartaqalerneranut atatillugu iliuusissatut pilersaarummi Green Hub Denmarkip siunissami atorneqarsinnaanera sillimaffigineqarpoq.
”Siunissami ungasinnerusumi Aalborgip kommuniani Kommuneqarfik Sermersuumilu suliffissanik pilersitsitsisussanik, immikkut ilisimasaqalersitsitsisussanik teknologikkullu ineriartortitseqqiisussanik nutaaliornikkut mingutsitsinngitsunik pilersaarusiortoqarnissaa aallartitsisoqarnissaalu pilersaarutigineqarpoq. Aallartisarlualereerpugut” borgmester Charlotte Ludvigsen oqarpoq.
Misileraavik silap pissusaani sakkortuuni teknologinik mingutsitsinngitsunik misileraanermik ingerlatsissaaq. Misileraavik Issittumittaaq teknologiinik mingutsitsinngitsunik pilersitsinerni siuttuusaaq.
