Kommuneqarfik Sermersuup atornikuerniarfia Atoqqik Nuummi innuttaanut akornanni alutorineqaqaaq.
”Innuttaasut amerlasuut atornikuerniarfipput atortarpaat. Innuttaasunit pequtinik atortunillu tunineqartarpugut kisianni aamma illoqarfimmi suliffeqarfinnit assigiinngitsunit”, Arnaaraq Petersen oqarpoq.
Massakkut Atoqqik ukiup affaa ammareerpoq sulilu amerlasuut pequtit atoqqitassanngorlugit tunniuttarpaat, amerlasuunillu pequtit tunniussat atoqqinneqartarput.
”Nammineq pequtit atortullu pigisat pigiinnarusunngikkaanni, eqqagassanik tigooraavimmut tunniunneqassapput. Uani qulakkeerneqassaaq pequtit atoqqinneqarnissaat atorneqartussaanngitsullu iginneqassapput. Siunertaraarput pequtinik atortunillu eqqaaginnarata atoqqiinissarput taamaalilluta avatangiisinik mianerinnissagatta.
Atoqqimmi pequtit atoqqitassat soorlu sofat, siniffiit, ilisiviit, issiaviit qulliillu aamma allat atortut soorlu angerlarsimaffimmi atorneqarsinnaasut pisiarisinnaavatit.
”Ilisivinnik, sofanik, allaffimmi nerrivinnik siniffinnillu inuit aggiussisarput. Igaffimmi atortunik arlalinnik aamma pissarsisarpugut. Elektronikkit tigoorartanngilagut ajoquteqannginneri qulakkeersinnaannginnatsigu. Amerlanerit akeqanngitsumik aaneqarsinnaapput, ilai akikitsuaranngorlugit tuniniartarpagut, annerpaamillu 300 koruuneqartarput”, Arnaaraq Petersen oqarpoq.
Atornikuerniarfik Pukuffimmi Ikuallaaviup eqqaaniippoq sapaatip akunneranut marloriarluni ammasarpoq nalunaaqutaq 14-17:30 kiisalu arfininngornermi nalunaaqutaq 10-14.
