Innuttaasunut

Angerlarsimaffeqanngitsunut unnuisarfiup ingerlanneqarnera Sermersuup utertippaa

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq Nuummi angerlarsimaffeqanngitsunut unnuisarfiup ingerlanneqarnerata utertinneqarnissaanik aalajangerpoq. Tamanna pivoq, unnuisarfimmik atuisunit, sulisunit suleqatigisanillu pissutsinik ernumassuteqarnermik kommune nalunaarutisisarnerata kingorna.

Ukiuni kingullerni marlunni suliffeqarfik namminersortoq Tarraq angerlasimaffeqanngitsunut unnuisarfiup ingerlanneqarneranik isumaginnittuuvoq.

”Tusagassiutitigut sulisut akissarsisarsimanngitsut, unnuisarfiup qatserisartoqarnermut oqartussaasunit akuerineqartunit amerlanerusunik tigusisarsimaneranik taamatullu suleqatigisat pingaarutillit unnuisarfimmukarusukkunnaarneri, aqutsisunik aporaanneq pissutigalugu, atuarsinnaasimavarput. Taamatut nalunaaruteqartoqartarnera soorunami tusaanngitsuusaarsinnaanngilarput”, Kommuneqarfik Sermersuumi Suliffeqarnermut Isumaginninnermullu Ataatsimiititami siulittaasoq, Inge Olsvig Brandt, oqarpoq.

Suleqatigiinnerup ingerlanera tamaat suliffeqarfimmiit nalunaarusiat pissarsiariniartarnerat assut ajornartorsiutigineqartarsimavoq.

”Tarraq arlaleriarluni ingerlatsinermut tapiissutit qanoq atorneqartarnerinik imaluunniit atuisut qanoq amerlatigisut sullinneqartarnerinik nassuuiaarusuttarsimanngilaq. Akileraartartut aningaasaataasa taamatut atorneqarnerat soorunami attanneqarsinnaanngilaq, Inge Olsvig Brandt oqarpoq.

Kommune ingerlatsinissamik isumaqatigiissut malillugu suliamik ingerlatsisup pissutsinik arlalinnik ullut 20-t iluini iluarsiissuteqarnissaanik qinnuiginnissinnaavoq. Ajoraluarmilli oqaatigisariaqarparput tamanna Tarraq-mut iluatsissimanngimmat.

“Tarraq innuttaasutsinnut ajornartorsiuteqartunut sullissineq naammattoq tunniussinnaasimanngilaa”, Inge Olsvig Brandt oqarpoq.

Ingerlatsineq Kommuneqarfik Sermersuumit erngertumik atuutilersumik tiguneqarnissaa piareersimaffigineqarpoq.