Services

Aalborgimi Kalaallit Nunaannut ulloqartitsineq: Inuussutissarsiornermik ineriartortitsineq qitiutillugu

Kommuneqarfik Sermersuup Aalborgillu kommuniata akornanni illoqarfittut ikinngutigiittut suleqatigiinnermut atatillugu Aalborgimi Kalaallit Nunaannut ulloqartitsinermi Sermersooq  tikeraartitaqassaaq. Aningaasaqarnermut Inuussutissarsiornermullu Ataatsimiititaq, kommunimi inuussutissarsiornermut siunnersuisoqatigiit pingasut kiisalu allaffeqarfik aallartitaqassapput. Pilersaarut sulianut tunngassutilinnik saqqummiinernik, suliffeqarfinnut pulaarnernik, kommunillu taakku marluk akornanni suleqatigiinnernik allanillu imaqarpoq.

Nuummi inuussutissarsiornermut siunnersuisoqatigiinni siulittaasup Grønlandsbankenimi pisortatut tullersortaasup John Jakobsenip aaqqissuussineq annertuumik pingaartippaa:

Nunat kiisalu pisortat namminersortullu akornanni killeqarfiit qaangerlugit suleqatigiilluta kommuni tamakkerlugu inuussutissarsiutinik ineriartortitsinermik eqqartueqatigiissinnaanerput nalitoorujussuuvoq. Kalaallit Nunaata avataani suleqateqarneq aningaasaqarnikkut ineriartornermut coronallu kingorna aallartisaqqinnissatsinnut qitiulluinnarpoq. Taamatuttaaq inuussutissarsiornermut siunnersuisoqatigiinni politikerinik itisuumik oqaloqatiginnissinnaanissamut periarfissinneqarnerput assut nuannaarutigaara taamaalillutami akunnitsinni pisariaqartitatsinnik isiginnittaatsitsinnillu suli paasisaqarnerussaagut, John Jakobsen oqarpoq.” 

Inuussutissarsiutinik ineriartortitsineq nunani tamalaat akornanni attaveqatigiinnermik pilersitsinermik, Nunatsinnit nioqqutissanik avammut tunisassiorsinnaanermut periarfissat annertusarnissaannik, kiisalu suliffeqarfinnut ineriartortitsisuusunut atugassatigut sinaakkutinik pitsanngorsaanermik annertuumik tunngassuteqarpoq. Tamanna ilutigalugu nunani tamalaani piujuartitsinermut qitiutitsineq siunissami ineriartornermut akisussaaqataanermullu aalajangiisooqataalluinnarpoq.  Tamakku sapaatip akunnerani uani eqqartugassat ilagaat.   

Ullut taakku inunnut, ingerlatsiveqatigiinnut suliffeqarfinnullu Nunatsinnut soqutiginnittunut ataatsimoorfiussapput. Ullut taakku piffissami sivitsortumi ileqquupput, ukiullu marlukkaarlugit Nuummi Aalborgimilu paarlakaattumik ingerlanneqartarlutik. Nunatsinni coronamik tuniluunneq pissutigalugu angalanissamut atatillugu arlaleriarluni nalilersuisoqartarsimavoq, tuniluuttoqarsinnaaneralu sapinngisamik annikillisarniarlugu maleruagassiortoqarsimalluni.

Aalborgimi Kalaallit Nunaannut ulloqartitsineq 2021-mi augustip ulluisa 10-annit 12-iannut ingerlassaaq.