Innuttaasunut Utoqqaat

Nuummi utoqqaat illuanni sulisut sulinngitsoortarnerat ikilingaatsiartut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sulisut sulinngitsoortarnerat ikilisinniarlugit ukiut kingulliit marluk utoqqarnik sullissinermik ingerlatsiviup suliffimmi avatangiisit sulisullu atugarisaat pitsaanerusut anguniarlugit sulisimapput.

Ukioq kingulleq aggustimi angerlarsimarfimmi ikiortit ullut sulinngitsoorfii affaannanngortinneqarsimasut allaaseraarput, ineriartorneq nuannersoq aamma Utoqqaat Illuani pivoq.

Utoqqarnik sullissinermi ingerlatsivimmi immikoortortani sulisut aqutsisullu toraarfeqartigiillutik anguniagartik anguniarsimavaat. Suliartorluni takkuttarnerit amerlanerulersinniarlugit assigiinngitsorpassuarnik suliniuteqartoqarsimavoq, suliniutillu tamarmik assigiinngitsunik sunniuteqarsimallutik.

“Utoqqaat illuani nuannersumik ineriartortoqarsimanera takusinnaallugu tulluusimaarnaqaaq – Suliassaq taama annertutigisoq kivissagaanni akisussaaqatigiinnissaq pisariaqarpoq, tamannalu Utoqqaat Illuani aqutsisut iluatsissimavaat. Utoqqaat Illuat aqutsisugissaarluni sulisugissarpoq, taakkulu utoqqaat ulluinnarni inuunerannut sunniuteqarluaqaat,” Utoqqarnik Sullissivimmi pisortaq Arnannguaq Heilmann Christensen taama oqarpoq.

Annikilleriarujussuartut
Utoqqaat illuani sulisunut avatangiisit pitsanngoriarnera sulisut naammagisimaarinninnerulernerat sulerusunnerulernerannik kinguneqarpoq.

Aqutsisut sulisuminnut maligassiuilluarusussimapput, aqutsisullu suliartunngitsoortarnerat annikillinerat malillugu sulisut suliartunngitsoortarnerat aamma annikilleriarsimapput, taamaattoqarneralu immikkoortortani tamani malugilluarneqarsinnaasimavoq. Kisitsisit 2019-imeersut ukioq mannalu maajimeersut takutippaat 2019-imi ullut sulinngitsoorfiusut ukioq mannamut sanilliullugu affaat sinnerlugu ikileriarsimasut.