Services

Kulturimut, peqqinnermut aamma sunngiffimmut tunngasunut akisussaaffik tamakkiisoq Tasiilap tiguaa

Tasiilami peqqinnermut, sunngiffimmut aamma kulturimut tunngasunik suliassaqarfiit tamarmik siunissami sumiiffimmi Tasiilami isumagineqalissapput. Taamatut pisoqarpoq suliassaqarfiit sumiiffimmi innuttaasunut qaninnerulersinneqarnissaannik aamma Tasiilami suliassaqarfiit allat suleqatigineqarnissaasa oqinnerulersinneqarnissaanik kissaateqartoqarnerata kingorna.

Kommuneqarfik Sermersooq peqqinnermut, sunngiffimmut aamma kulturimut tunngasunik suliassaqarfiit iluini aaqqissusseqqippoq. Tamanna imaappoq, akisussaaffik Nuummiit Tasiilamut nuunneqartoq.

”Aalajangiisarnerit innuttaasunut qaninnerulissapput, tamannalu assut nuannaarutigivarput. Takorluukkatsinnik suli taakkuninnga suliaqarpugut, taamatulli allannguisoqarneratigut uagutsinnut sumiiffimmi naleqqussaanissarput, killissaritinneqartut iluini, ajornannginnerulissaaq”, Tasiilami immikkoortumi pisortaq, Hjørdis Viberg, oqarpoq.

Isumaqarpoq, allannguineq innuttaasunut aamma sulisunut iluaqutaassasoq, taakku najukkami suliassaqarfinnik qitiutitsillutik aallussisinnaanngormata.

Nuummi ingerlatsivik suli suleqatigineqartassaaq, innuttaasut sumiluunniit najugaqaraluarpata sullissinerup assigiiaarnissaa qulakkeerumallugu. Peqatigitillugu Tasiilami Nuummilu kommunip ataatsimut anguniagaanik suliat ingerlatiinnarneqassapput.