TIME Magazine-mit eqqartorneqarnissaq nalinginnaasumik takorluugaannaasarpoq. Kisiannili Nuuk piujuartitsiffiusunngortinniarlugu ilungersorluni suliniuteqarnerup kingunerisaanik, nunarsuaq tamakkerlugu tusagassiorfiit nuimanersaannit Nuuk maluginiarneqarsimavoq. Tamanna eqqortumik ingerlanitsinnut takutitsivoq, sulilluarnerpullu ingerlatiinnassavarput, borgmesteri ilaatigut taama oqarpoq. Foto: Magnus Trolle
Sermersooq Business, piffissami sivitsortumi, ingammik takornariaqarnermut tunngatillugu, Nuup piujuartitsiffiunerulertinnissaa siunnerfigalugu suliaqarsimavoq. Taanna suliniut, massakkut nunarsuaq tamakkerlugu tusagassiorfiit nuimasut ilaannit eqqartorneqarpoq.
”TIME Magazine-mit maluginiarneqarnerput assorsuaq tulluusimaarutingaara. Takornariartarfittut piujuartitsiffiusunngornissarput annertoqisumik sulissutigisimavarput, massakkullu maluginiarneqarnerput, sulinitta kinguneqarluarsimaneranut ersarissumik uppernarsaatissaavoq”, borgmester Charlotte Ludvigsen oqarpoq.
Takornariartarfittut piujuartitsiffiusutut Earthcheck-imit allagartalerneqarnissaq suliniummut pingaarutilittut ilaatinneqarsimavoq, inaarutaasumillu allagartalerneqarnissaq aggustimi pissasoq Sermersooq Business-ip naatsorsuutigaa. Taamaalilluni Nuuk nunarsuarmi illoqarfinni pingaarnersani siullersaalluni tikiffissatut piujuartitsiffiusutut imminut taasinnaanngorpoq
Sulineq ingerlaannassaaq – ullut tamaasa
Maluginiarneqarnerup inaarutaasumillu allagartalerneqarnerup kingorna Nuuk ornitassanut piujuartitsineq pineqartillugu siuarsimanerpaanut ilanngutissaaq.
”Suliatta maluginiarneqarnerata kommunitut eqqortumik iliortugut uatsinnut uppernarsitippaa. Ilutigaluguli suli pitsanngorsaasoqarsinnaasoq nalunngilarput. Taamaattumik tamassuma soorunami inuaqatigiittut piujuartitsiffiunerulernissatta sulissutigiinnarnissaanut piumassuseqarnerutilerpaatigut. Tamanna ullut tamarluinnaasa eqqarsaatigisarpara” Charlotte Ludvigsen oqarpoq.