Services

Tunumi sinerissap qanittuani aalisarneq pitsanngorsarneqarpoq

Eqqiluisaarnerup pingaartinneqarnissaa pillugu pikkorissaaneq suliniutigineqartuni naammassisat kingullersarivaat, Tunumi sinerissap qanittuani aalisarnerup pitsanngorsaavigineqarnerani. Inuit katillugit 39-t marsip ingerlanerani pikkorissaanermik naammassinnipput pikkorissartunillu pikkorissarneq iluarineqarsimavoq.

Kommuneqarfik Sermersooq aamma Inuili – Food College Greenland suleqatigiillutik pikkorissaanerit sisamat Tunumi ingerlassimavaat. Pikkorissaaneq sinerissap qanittuani aalisarnerup ineriartortinneqarnissaanut suliniuterpassuit ilagivaat, taanna “Tunumi Piniartuunermiit aalisartuunermut” qulequtserneqarpoq, Tasiilamilu marloriarlugu ingerlanneqarpoq aamma ataasiarluni Kuummiuni aamma Kulusumi, Tiilerilaamit aamma Sermiligaamit peqataasoqarluni, ingerlanneqarpoq.

Pikkorissarnermi eqqiluisaarneq qitiutinneqarpoq, pikkorissaanerlu naggaserlugu pikkorissartut pikkorissarsimanerminnut certifikatimik uppernarsaatitut tunineqarput.

Aalisartoq tunisinermini akimik qaffasinnerusumik pissarsisinnaavoq aalisakkat sapinngisamik eqqiluisaarnermut tunngasut malillugit suliarisimagunigit, tamanna pitsaassutsimik qaffasissumik angusaqarfiussammat.

”Angerlarsimaffitsinni angalanitsinnilu eqqiluisaarnerup qanoq pingaaruteqartiginera ilikkarparput. Massakkut suliassara siulleq tassaavoq errorsivissinissara, tulliullugulu angallatiga tamaat eqqiarnissaa. Qujanarujussuaq!” pikkorissartut nuannaartut ilaat oqarpoq.

Piniartuunermiit aalisartunngorsaaneq
Qulequtaata oqaluttuarneratut, aalisartuunerup/piniartuunerup iluani inuit nukii atorlugit aalisarnerup ineriartorteqqinnissaa anguniarneqarpoq.

”Tunumi aalisarneq ineriartorpoq uagullu inuussutissarsiutip pitsaasumik ineriartortinneqarnissaanut sunik tamanik ikiuukkusuppugut. Upperivarput tamanna pitsaanerpaamik najukkami sulisussanik piukkunnarsaanikkut anguneqarsinnaasoq” Salik Hard, Sermersuumi Inuussutissarsiornermut immikkoortumeersoq oqarpoq.

Anguniagaavoq Tunumi aalisarnerup aalisakkanik nioqqutissiornermi unammilleqatigiinnermut peqataanissaa, nunap iluani aamma avammut nioqquteqarnermi.

Assiliisoq: Frede Kilime