Services

Tasiilaq: Tasiilap illoqarfittut eqqissisimanerusutut isikkoqartilernissaanut suliniut iluatsippoq.

Qaammatini marlunngulersuni Tasiilami pisiniarfiit silataanni ernguttoqaranilu nipiliortunik amerlasuunik katerittoqarsimanngilaq.   Erngunnerit aqqusinermilu nipiliornerit akissarsiffiup nalaani ajornartorsiutaasarsimagaluarput, taamaakkunnaarporli.

Innuttaasut suliniummik tapersersuinerat allannguuterujussuarmut pissutaavoq.

Illoqarfimmi pisiniarfiusut marluk, Pilersuisup RF-elektronikkillu Kommuneqarfik Sermersuumik isumaqatigiissutaanni, pisiniarfiit silataanni aalakoortoqarpat eqqissiviilliortoqarpallu, eqqissisimaqqilertoqartinnagu aalakoornartunik tuniniaaneq matuneqartassasoq allaqqavoq.

“Tamanna iluatsilluarsimaqaaq. Akissarsiffimmiluunniit pisiniarfiit eqqissisimaffiusimapput, aalakoornartullu ataasiaannarluunniit matuneqartariaqarsimanngillat”, Kommuneqarfik Sermersuumi Tasiilami immikkoortortami aqutsisoq, Hjørdis Viberg oqarpoq.

Aaqqissuussineq maajip aallartinnerani misiligutitut atuutilersinneqarpoq, iluatsilluarmalli suleqatigiit ataavartunngortissallugu massakkut aalajangiuppaat, tamannalu Hjørdis Vibergip nuannaarutigaa.

”Najukkatsinni pisiniarfiit innuttaasugullu akisussaaffimmik tigusisinnaanerminnut piareersimallutik takutivissorpaat. Pisiniarfiit atuarfimmut meeqqerivinnullu qanipput, meeqqallu amerlasuut sumiiffimmiittarput. Taamaattumik sumiiffiup kikkunnut tamanut toqqissisimaffiutinneqarnera nalunaarutaassaaq pingaarutilik”, Hjørdis Viberg oqarpoq