Elektrikerit Sipisaq Kangillermi sulisimapput. Qaqqammi innartaani qullernik ikkussuisimapput, qulliillu inissitsiterneri assigiinngitsut misilerarneqareerput.
Qulliit qullilersuilluni suliniummut Azizi, Light-imut, illussanik titartaasartumit Bilo Høegh Stigsenimit titartaasarfimmik Proces-imik Nuummi allaffilimmik piginnittumit eqqumiitsuliamut ilaapput.
Suliniummi Polar EL suleqataavoq, innaallagissamut tunngasunik ilisimasuulluni, pilersaarullu Nuummi Najukkami Ataatsimiititaliamit kiisalu Aningaasaateqarfik Sermermit aningaasaliiffigineqarpoq.
Illoqarfiup ilaanik pinngorartitsinermik, nuannersumik isumassarsiorfiusumillu peqartitsinissaq suliniummi takorloorneqarpoq.
”Aziz, Light! atorlugit immikkoortumi ulluinnarput qalipaatilersorneqassaaq, ilutsimigut malunnartoq sakkortoorlu Nuummilu sumiiffik pingaarutilimmik atassusiisuuvoq.” Bilo Høegh Stigsen oqaluttuarpoq.
Sipisaq Kangilleq Nuup Nuussuullu akornanni aqqusinikkut attaviliiniarluni 70-ikkut naalerneranni qaqqaq qaartiterlugu sipisaavoq. Sipisaq Kangilleq Nuummi aqquserngit angallaffigineqarnerpaat ilagivaat, ullup unnuallu ingerlanerani 16 tusinderiarluni, biilinik, pisuinnarnik sikkilertunillu angallaffigineqartartoq.
Qulliit assigiinngitsunik tallimanik qaammartartunngorlugit inissitsiterneqarsimapput. Programi qulliit qaamanerinik allanngorartitsisassaaq taamaalillunilu Sipisaq Kangillermi nutaanik qullernik isigisaqartoqartuaannassaaq. Tamatuma saniatigut qulliit siumut aalajangeriikkanik tallimanik programeqarput takutinneqartartussanik: LGBT, Iviangikkut kræftimut akiuiniarneq (Støt brysterne), Poorski Juullilu.
Qulliit pingasunngornermi juunip 23-ani ikinneqassapput, LGBT-lu assigiinngisitaarnermik ataqqinninniarluni sammisarineqassaaq. Juni LGBT-mut qaammatigitinneqarpoq
Taaguut ”Aziz, Light!” Luc Bessonip filmiliaanit Sci Fi-mit ”Det 5. Element” mit issuagaavoq. Filmimi Aziz nukappiaraavoq tarrarsuut atorlugu seqerngup qaamarnganik taartumut qaammartitsisussaq.
