Kommuneqarfik Sermersooq kommunitut naalagaaffeqatigiinnerup iluani siullersaalluni innuttaasunut peqataatitsivimmit innuttaasunit siunnersuummik kommunalbestyrelsimut nassiussaqarpoq, aammattaaq kommuniuvoq nalilersuutini arlalitsigut pitsaanerpaamik angusaqartoq.
Innuttaasunit siunnersuutit amerlanerpaat, ilanngullugit peqataatitsivimmik atuisutut nalunaarsukkat, danskit kommuniinut peqataatitsivimmik taama ittumik atuisoqartunut sanilliullugu Kommuneqarfik Sermersooq malunnartumik pitsaanerpaamik inissippoq.
Kommunimi innuttaasut amerlassusiini 19%-iisa atuisutut nalunaarsorsimanerat eqqarsaatigalugu kisitsisitigut kommunit allat appasissorujussuarmik, aappaattut 4%-mik pingajuatullu 2%-imik, inissisimapput.
Naalagaaffeqatigiinnermi pitsaanerpaaq
Kommuneqarfik Sermersooq danskit kommunii allat assigalugit innuttaasunit siunnersuutinik, peqataatitsivik CitizenLabs digitaliusoq aqqutigalugu toqqaannartumik politikerinut apeqquteqarnissamut periarfissiivoq. Kommunerpassuarnit tamakkunannga siullersaalluni Sermersooq innuttaasunit siunnersuutinik kommunimi politikerinut ingerlatitseqiivoq.
Qaammatip marsip naalerneranit kommunimi innuttaasunik peqataatitsivik Kommuneqarfiga siunnersuuteqarfigineqarsinnaalerpoq. Siunnersuut ullut 90-it ingerlaneranni innuttaasunit 250-init taperserneqarpat politikikkut ataatsimiititami attuumassuteqartumi qaqinneqassaaq. Ullut arfineq-pingasut qaangiutiinnartut siunnersuut Kommuneqarfigamut Nuummi arpattarfik 400 m takissuseqartoq siullersaalluni maanna kommunalbestyrelsimut anngunneqarpoq.
Illit aamma tusarneqarsinnaavutit
Peqataatitsivik atorluarneqarpoq, atuisut nutaat siunnersuutillu takkussortuarput. Politikkikkut eqqumaffigineqartariaqartunik siunnersuutissaqaruit uunga iserlutit siunnersuuteqarit Kommuneqarfiga.gl. Aamma suliniutit allat malinnaavigisinnaavatit, innuttaasunit siunnersuutit allat apeqqutigineqareersut takusinnaavatit.