Tasiilami pisiniarfiit silatai toqqissisimanartunngortinniarlugit pisiniarfiit kommunilu suleqatigiilerput
Tasiilap pisiniarfiisa silataanni aalakoortoqarpat, nipiliortoqarpat imaluunniit amerlasuut katerippata taava imigassanik aalakoornartortalinnik tuniniaaneq matuneqartassaaq, pisiniarfiit silatai angallaffigissallugit toqqissisimanarseqqinnissaasa tungaanut. Kommuneqarfik Sermersooq illoqarfiullu pisiniarfii marluk, RF-Électronic aamma Pilersuisoq, suleqatigiinnerat pissutigalugu taamatut ersarissumik nalunaaruteqartoqarpoq.
Suliniummut tunngaviuvoq akissarsiffimmi pisiniarfiit saavini inuppassuit nipitoqisut katersuuttarmata annertuumillu aalakkullutik. Pisiniarfiit meeqqeriviit Timersortarfiullu eqqaralaannguaniipput, tassanilu meerarpassuit angallattarlutik.
Siunissami taamatut pissusilersortoqaraangat imigassanik aalakoornartortalinnik tuniniaaneq matuneqartassaaq, pisiniarfiit silataanni toqqissisimasumik pissusilersortoqarnissaata tungaanut.
”Pilersuisumut pisiniartarneq nuannersuullunilu toqqissisimanartumik misigineqartuassaaq, aamma meeqqanut ilaqutariinnullu meerartalinnut. Taamaattumik taamatut suliniuteqarneq tapersersorusupparput, taamaaliornikkullu pisiniarfiup silataani aalakoortunik ajornartorsiuteqartarneq unitsinneqassaaq, tamannami ajoraluartumik nalaattarparput”, Martha Mikaelsen, nunap immikkoortuani Tunumi Pilersuisumi pisortaq, oqarpoq.
Tamannalu RF-Electronic-imi piginnittup Wendy Andreassenip isumaqataaffigaa. ”Illoqarfimmi inuiaqatigiinnut ilaavugut, taamaattumillu illoqarfimmi ajornartorsiutit aaqqiiviginissaannut soorunami akisussaaqataagatta peqataassaagut”, Wendy Andreassen oqarpoq.
Tasiilami ataqatigiissaarisartut aqqutigalugit isumaqatigiissusiortoqarpoq, tassani ilaatigut politiit kommunilu sinniisuutitaqarput, Tasiilamilu Kommuneqarfik Sermersuumi immikkoortortami pisortap, Hjørdis Vibergip, pisiniarfiit annertuumik nersualaarpai.
”Pilersuisoq aamma RF-Electronic inuiaqatigiinnut annertuumik pisussaaffimminnik tigusillutik takutippaat taamatut aaqqiissuteqarnermut peqataanermikkut. Tamanna assut iluarisimaarpara. Neriuppunga tamatta Tasiilaq tamanut toqqissisimanartinnissaanut suleqatigiissinnaassalluta”, Hjørdis Viberg oqarpoq.
.Aaqqissut iluatsippat killeqanngitsumik atuutilersinneqassaaq.