Kulturi Peqqinneq pitsaaliuinerlu Sunngiffik

Nuummi Nipilersornermi Ilinniarfik Tasiilamut angalaartoq

Ilinniartitsisut marluk ilinniartullu pingasut Nuummi Nipilersornermi Ilinniarfimmeersut marsip naalernerani Tasiilamut piginnaasamik tunniusseqatigiinniarlutik angalaarput, kinguneranilu Tasiilami ilinniartut peqatigalugit appisimaarlutik. Nipilersornermik Ilinniarfiup ilinniartitsisui aatsaavissuaq ilinniartuutiminnik ilaqarlutik Tasiilaliarput

©Nuummi Nipilersornermik Ilinniarfik

Marsip naalernerani Nuummi Nipilersornermi Ilinniarfimmiit ilinniartitsisut Johannes Sigurdsen Miki Fleischerilu, ilininniartitaalu Sofus Kronborg Hinnerup, Aputsiaq Eriksen, Ivik Samuelsenilu sapaatip-akunnerata missaani Tasiilamut piginnaasaminnik paarlaaqatigiinniarlutik angalasimapput. Angalanerup siunertaa tassaasimavoq Nuummi Tasiilamilu nipilersornermik ilinniartut naapinnissaat, ataqatigiinnerulernissamullu periarfissinnissai. Tamanna saniatigut ilinniartut ataatsimut nipilersornermut tunngasunik ilinniartsinneqarput, misiginikuusaminnillu avitseqatigiillutik. Angalaneq illoqarfiup innuttaasuanut appisimaarnermik naggaserneqarpoq.

”Isumaqaratta atuartut nipilersornerup tungaatigut avitseqatigiittuarnissaat pisariaqartoq. Kommuneqarfik Sermersuup iluani tikeraaqatigiinnerit pisarsimapput, aatsaalli perngaammik Nuummit nipilersoqatigiinni ilinniartuutigut peqatigalugit aallarpugut. Misigisaq immikkuullarippoq, ulluinnarsiuterput nipilersorneq peqqinnarluinnartumik immikkuullarissumik misigisaqarfigaarput. Angalanerput nuanneqaaq uerinarlunilu,” Taama Johannes Sigurdsen, Nuummi Nipilersornermi Ilinniarfimmi ilinniartitsisoq oqarpoq.

Ilinniartut inunnut nipilersornissamut unamminartuusinnaasut misiliortorpaat. Assersuutigalugu appiffissaq qanillereersoq erinnanik nutaanik sungiusaqatigiineq, nipilersuutinik ikkussuineq, nipilerineq, akisussaafimmilu nammaqatigiinneq.

Angalaneq Tasiilap timersortarfiani innuttaasunut appisimaaqatigiinermik naggaserneqarpoq. Naagujoq Band, Tasiilaq Swing Band, MS Band Nuuk appisimaareernerata kingorna ilinniartut tamarmik immikkut akuleriiaallutik appittaqattaarput. Tusarnaariat ataasiakkaat nuannaarnertik takutinniarlugu aningaasanik paggatsitsipput.