Oktoberip qaammataa takutitsinerup silarsuaanut pulaffigineqarumaarpoq isiginnaartitsisartut arfinillit nipilersortartullu ataasiakkaat Paamiut tikikkunikku, piumassuseqartut takutitsinerup imminullu saqqummiussinnaanerup tungaatigut sakkussaanik pikkorissarneqassapput. Festival isiginnaartitsinermik naggaserneqarumaarpoq
Oktoberi pissanganarluinnartumik paamiormiunut qilanaarutissaqarpoq, illoqarfiup nipilersortartuisa tusarnaartitseqattaarnerisa saniatigut innuttaasut isiginnaartitsinermik soqutigisaqartunut pikkorissaasoqarumaarmat. Tamanna isiginnaartitsisartut arfinillit nipilersortartullu marluk siniariammeersut misilittakkatik ilinniakkatillu tunngavigalugit isiginnaartitsinermik pikkorissaajumaarmata.
Kiinnat Festival siunertaa tassaavoq Paamiuni innuttaasutut naleqartitatik ilisarnaatitillu tappifigilernerunissaat. Naleqartitat tassaasinnaaput, imminut tatigineq, ataqatigiineq, inunnut saqqummiussisinnaaneq, suleqatigiissinnaaneq kinaasuserlu.
Aaqissuisut neriuutigaat Kiinnat Festival Paamiuni kultoritigut pisoqartarneranut inerisaaqataasinnaassasoq.
”Isumaqarpugut innuttaasut taamatut avataaniit, piorsarsimassutsip silarsuaaniit, qiimmassaamik siualaarfineqarnissaat??? pitsaassasoq, tassami piorsarsimassutsip siuarsimanera, timitalersornera Nunatsinni isorartoqisumi illoqarfinni marlut pingasuusuni ingerlanneqarmat, timitaqartinneqarmat. Sunniuteqassaaq soorlu maanna fjernsynikkut internettikkullu takusinnaasagut piviusunngorlugit qanimut misigisinnaagutsigit. Innuttaasut taamatut takusaqarnissaat, piviusumik, peqataaffigalugit, pingaarnertullu malinnaaffigisinnaallugit pisuusaartitsinerit, isiginnaartisinerit, nipilersornerit, pisoqartitsinerillu, qilanaarnarpoq pissanganarlunilu,” Taama Kùnak Lorentzen, Kommuneqarfik Sermersooq – Paamiut, Peqqinnermut Sammisassaqartitsinermullu immikkoortortaqarfimmi Pisortaq naggasiilluni taama oqarpoq.
Pikkorissaanissaq Kommuneqarfik Sermersuup kulturitigut pilersitsinissamut tapiisarfianiit, Sermeq Puljenimit taperneqarpoq. Sermeq Puljennimut qinnuteqarfissap tullia novemberip ulluisa aallaqqaataanut 2021 killeqarpoq.