Services

Carl Juhl-imut eqqaaniut

Ullumikkut inuussutissarsiuteqartup Carl Juhl-ip toqukkut qimagunnera alianartoq tusarpara. Carl Juhl ukiut 50-it sinnerlugit Nuummi Kalaallit Nunaallu tamakkerlugu ineriartornermut pingaaruteqarluinnarsimavoq. Allat peqatigalugit siuarsaanernik suliniuteqartarsimavoq inuiaqatigiinnut innuttaasunullu suliffissanik ineriartornissamullu periarfissanik tunniussaqarsimalluni. Akunnittarfinnik neriartarfinnillu piginnittutut Nunatsinni takornariaqarnermik siullersaat ilagalugit ineriartortitsisuusimavoq, tamannalu inuunini tamaat ingerlassimavaa. Isertitaqarnissaq kisiat pillugu kajumissuseqaannanngilaq, Nunarpulli takornariaqarfittut takorluugaralugu pilersaaruteqartarportaaq. Ukiualunnguit matuma siorna Hotel Hans Egede ataatsimeersuartarfilerlugu allileeqataaffigaa, ukiorlu kingulleq Nuummi akunnittarfik akikitsoq siulleq ammaaqataaffigalugu. Suliniutit taakku Nunatsinnut suliffinnik pitsaasunik pilersitseqataallutillu isertitsissutaapput. Pitsaasumik suliffeqarluni pitsaasumik inuuneqarsinnaaneq inuppassuarnut pingaaruteqarpoq. Tassa taamatut suliffinnik pilersitsisarneq pitsaasumik inuuneqarnissamut pingaarnerpaat ilagivaat.

Illunik sanaartornernut aningaasaliisartutut Carl Juhl aammattaaq Nuummi ineriartortitsinermut malunnaatillit ilagaat. Periarfissat takusinnaasimammagit aningaasaliiffigalugillu ilaqutariippassuarnut, inuusuttorpassuarnut utoqqarpassuarnullu angerlarsimaffeqarnissaq piviusunngorsinnaasimavoq. Aningaasaliissutit taakku siunissamik pilersitseqataapput, taamaattumillu Nunatsinni aningaasarsiarisimasat Nunatsinnut aningaasaliissutaaqqinnissaat pingaartuuvoq.  Tamanna Carl Juhl-ip paasisimavaa.

Carl Juhl illoqarfimminut uummateqarnera uannut ersarippoq. Pilersitsinissaq inuiaqatigiillu pingaartitarivai. Innuttaasut taama ittut kommunimi pisariaqartittuarpavut. Inuunermini sivisuumi niuerluarsinnaaneq saniatigullu inuiaqatigiit iluaqutigisinnaasaanik ataatsikkut iliuuseqarsinnaaneq takutittuartarpaa.

Nammineerlunga Carl Juhl akuttusuumik naapittarpara. Inuttut alutornartutut iluarinartutullu isigaara. Maluginiartuartarpara sulisuisa innuttaasullu Carl Juhl nuannaartunartutut isigisaraat. Arlalinnut maligassiuisuusimavoq, taamaattuartussaallunilu. Eqeersimaarneq, suliaqarusussuseq neriulluarnerlu takutittagai siunissami nukittoqqutitut, ammasumik qiimasumillu ingerlanissatsinnut maligassiuisuupput.

Ullumikkut ilaqutaasut inuppassuillu Carl Juhl-ip inuunermini sivisuumi qanitarilersimasai eqqarsaatinniipput.

Carl Juhl-ip eqqaaneqarnera ataqqinartuuli. Charlotte Ludvigsen, Borgmesteri, Kommuneqarfik Sermersooq