Sunngiffik Uumasut Pingortitarlu

Sunngiffimmi aallaaniarsinnaanermut allagartaq kingusinnerpaamik apriilip 30-ani akileruk nutarterlugulu

Sunngiffimmi aallaaniarsinnaanermut allagartaq apriilip ulluisa 30-anni nal. 20:00 nutartersimanngikkukku, ukioq manna 2021-mi tuttunniarnissamut umimmanniarnissamullu akuersissummik qinnuteqarsinnaajunnaassaatit.

Kommuunip innuttaasunut sullissiviani sunngiffimmi aallaaniarsinnaanermut allagartamik qinnuteqarsinnaavutit, kingusinnerusukkullu bankimut, bankivit App-ia atorlugu imaluunniit allakkerivimmi akilerlugu. Digitaliusumilli aamma aaqqiissutissaqarpoq. Tassa imminut sullinnermut isertarfik Sullissivik.gl aqqutigalugu qinnuteqarlutillu akiliisinnaavutit. Sunngiffimmi aallaaniarsinnaanermut allagartaq apriilip ulluisa 30-anni nal. 20:00 akilereersimasussaavat.

“Innuttaasut ilaat Sullissivik.gl aqqutigalugu sunngiffimmi aallaaniarsinnaanermut allagartaq aallugulu akilereersimavaat, aamma innuttaasut allat digitaali atorlugu allagartartik nutarsassagaat kaammattuutigerusupparput. Tamanna innuttaasumut ajornannginneruinnarani sullissinermi sulisunut assut oqilisaataasarpoq,” Klaus Møller, Kommuneqarfik Sermersuumi innuttaasunut sullissivimmi siunnersorti taama oqarpoq.

Ukioq kingulleq iluatsilluartoq
Piffissaliunneqartup iluani sunngiffimmi aallaaniarsinnaanermut allagartat akilersimagukku, kingusinnerusukkut uumasut aalajangersimasut piniarusutatit aallaaniarnissaannut akuersissummik qinnuteqassaatit. Kommuneqarfik Sermersooq ukioq manna aammaarluni akuersissutinik nittartakkakkut qinnuteqarsinnaanissamik periarfisseeqqinnissaq neqeroorutigeqqittussaavaa.

Tuttunniarsinnaanermut umimmanniarsinnaanermullu nittartakkakkut qinnuteqartitsinerit ukioq kingulleq iluatsilluarsimapput, tassa qinnuteqartartut 1000-it missaaniittartut 2500-nut amerleriarsimagamik. Iluatsilluartumik angusaqarsimaneq isumalluarnermik pilersitsivoq.

Siullermik allagartaq, tulliani akuersissut
“Neriuppugut innuttaasut sunngiffimmi aallaaniarsinnaanermut allagartaat digitalikkut nutarterlugulu akilissagaat. Suliaq pillugu sullissineq sukkanerujussuulluni pitsaanerujussuussaaq,” Klaus Møller taama oqarpoq.

Sunngiffimmi aallaaniarsinnaanermut allagartat akilersimanngikkukku, Sullissivik.gl aqqutigalugu akileruk imalunniit sumiiffinni kommuunip innuttaasunut sullissivia aqqutigalugu nutarteruk. Apriilip ulluisa 30-anni nal. 20:00 akilereersimasussaavat. Tamanna nallertinnagu akiliinngikkuit ukioq manna aallaaniarnissamut akuersissummik qinnuteqarsinnaanavianngilatit.