Tasiilami innuttaasut illartinneqarlualaavipput, inuusuttullu kajumissaataasunik oqaaqqissaarneqarlutik quiasaarisartoq oqalugiartartorlu Piitannguaq Alaufesen illoqarfimmut tikeraarmat.
Quiasaarisartoq ilumoorsaarsinnaasoq aamma meeqqat atuarfiannut pulaarpoq tassani pimmatiginnittarneq pillugu oqalugiarluni, inuit imminnut pimmatiginnikkaangata pitsaanngitsunik sunik qanorlu kinguneqarsinnaaneranut tunngasunik. Matumani meeqqat qanoq imminnut tatiginerminnik nukittorsaasinnaanerat pillugu aamma oqaaqqissaarneqarput, soorluttaaq ullut artornartut qanoq qaangerneqarsinnaanerannut tunngasunik.
Inuusuttut klubbiat Igdlo, sunngiffimmi susassaqartitsivik aamma inuusuttunut sullissivik nutaaq Piitannguaq Alaufesenimit aamma pulaarneqarput. Ilungersunartut oqaluuserineqarput kisianni aamma imminut qanoq ikioqatigiissinnaaneq nukittorsaqatigiissinnaanerlu eqqartorneqarput.
Tasiilami innuttaasut tamarmik aamma periarfissinneqarput, Piitannguaq Alaufesenip takutitsinerinik quianartunik isiginnaarnissaminnut, sapaatip akunnerani Tasiilap illoqarfianiinnermini marloriarluni quiasaarigami. Utoqqaat angerlarsimaffiani najugallit quiasaarisartoq pulaarmat illartinneqarputtaaq, utoqqaallu nuannaarutigaat qiimmaallannartumik isersimasoqarnertik.
”Tasiilami innuttaasunut Piitannguup tikeraartiginera isumatoorujussuuvoq. Inunnik illartitsisarpoq, inuusuttullu sakkussanik atorsinnaasaminnik amerlasuunik pissarsipput, imminnut tatiginerulernermut atugassaminnik saniatigut inuunerminni oqaatsinik kaammattuutaasunik tunineqaramik, tamannalu uagut assut nuannaarutigaarput”, aaqqissuisoq Elise Uupi Kuitse oqaluttuarpoq.
Tikeraarneq Tasiilami imminut toquttarneq pillugu pinaveersaartitsinermut tunngassuteqarpoq. ”Iluatsilluaqaaq, innuttaasunut kisianni aamma inuusuttunu”, Elise Uupi Kuitse oqaluttuarpoq.
”Corona pillugu killilersuinerit peqqutaallutik inuit taamaallaat 100-t timersortarfimmut isersinnaapput. Inissat pilernguneqaqaat taamaattumik inissat tamarmik inuttassaqalermata matut matupallanneqarput”, Elise Uupi Kuitse oqaluttuarpoq.
