Nuummi meeqqanut inuusuttuaqqanullu ornittagaq ulloq unnuarlu ammasartussaq nutaaq unnugu ammaqqaassaaq. Ornittagaq nutaaq meeqqanut inuusuttuaqqanullu angerlarsimarusunnatik silamiiginnartartunut saaffiginnittuuvoq.
Kommuneqarfik Sermersooq februaarimi suliniut ”Toqqissisimanissaq pillugu angalaaqatigiinnik” taasamik pilersitsipput, taakku unnukkut illoqarfimmi angalaartarput meeqqat inuusuttuaqqallu attaveqarfigalugit, angerlaannissaannik neqeroorfigisarlugit imaluunniit inuusuttuaqqat ornittagaanni peqqinnartunik sammisaqartinnissaannik ilaserisarlugit. Ulluni akissarsiffiusuni aamma sapaatip akunnerata naanerani meerarpassuit inuusuttorpassuillu illoqarfimmi tarfisut takussaasarput, taammatoqartarneralu peqqutigalugu maanna Kommuneqarfik Sermersooq ornittakkamik ammaavoq.
”Piffissat ilaanni meeqqat angerlarsimarusunnginneranni ikiorlugit isumaginissaat pisariaqarluinnartarpoq. Meeqqat unnuakkut illoqarfimmi tarfisarnerat atornerluilertarnermik imaluunniit pinerluttuliortalertarnerannik kinguneqarsinnaasartoq misilittakkat takutippaat,” Meeqqanut Ilaqutariinnullu Ingerlatsivimmi pisortaq Martha Lund Olsen taama oqarpoq.
Ornittagaq nutaaq Nuummi Farip Aqqutaa 10-mi inissisimassaaq. Ullut tamaasa nalunaaqutaq unnukkut arfinermiit ullaakkut nalunaaqutaq arfineq-pingasut tungaanut ammasassaaq. Uani sapaatip akunnerata naanerani sisamanngornermiit nalunaaqutaq arfinermiit ataasinngornerup ullaakkuani arfineq-pingasup tungaanut ammassaaq.
Inuusuuttuaqqat kissartunik nerinissaminnik aammalu inulerinermik sulialinniik ilitsersorneqarnissamik periarfissaqarumaarput. Aamma meeqqat angerlarsimaffimminnut angerlarsinnaanngitsut ornittakami unnuisinnaanissaq periarfissaajumaarpoq.
