Services

Nuummi imarsiornermut tunngasunik attaveqaateqalertoq

Sermersooq Business aamma Sikuki Nuuk Harbour isumaqatigiipput Nuuk Maritime Network pilersissallugu suliffeqarfiit pitsaanerpaamik atugaqartinniarlugit. Inissitsiterluni ataatsimiinneq pissaaq maajip ulluisa sisamaanni nal. 8.45-13.00 Hotel Hans Egedemi, aamma attaveqaat suliffeqarfinnut arlaatigut imarsiornermik suliassaqartunut tamanut ammavoq.

”Kommuneqarfik Sermersuumi maannakkut siunissamilu inerisaanissamut imaq pingaaruteqaqaaq taamaattumillu imarsiornermut tunngasuni ineriartortitsinissaq pingaaruteqartorujussuulluni. Tamanna tunngavigalugu Sikuki Nuuk Harbour suleqatigalugu ineriartornermut tapersersuiniarluta Nuuk Maritime Network suliniutigaarput.  Ilimagilluinnarpara attaveqat suliffeqarfinnut peqataasunut tamanut iluaqutaalluassasoq,” Inuussutissarsiornermi pisortaq, Emil Skjervedal oqarpoq.

Inuussutissarsiornermut pisortap ilaatigut nalunaarusiaq siunnersuisarfik Deloittep kommunimut suliaa neriulluarnermigut tunngavigaa. Taassuma saniatigut allani attaveqaatini soorlu Sermersooq Businnessip aallartitseqataaffiginikuusaani pitsaasunik arlalinnik misilittagaqartoqarpoq. Assersuutigalugu takornarialerinermi inuussutissatigulllu attaveqaatit, suliaqarfinnut aalajangersimasunut qitiutitsisut. Tamannarpiaq pissutigalugu Nuuk Maritime Network pilersinnerani Sikuki Nuuk Harbour suleqatiginissaa pingaaruteqarsimavoq.

”Nuummi imarsiornermut tunngasut ineriartorteqqinnissaanut suleqatigiinnissaq nukittuujoreersoq arlalinnik periarfissaqartitsivoq. Inuussutissarsiutit assigiinngitsut iluanni suliffeqarfiit suliffiillu arlallit umiarsualivimmi imarsiornikkullu sammisanut attuumassuteqarput.  Sermersooq Business peqatigalugu taakkua malitsigisaannik suliffeqarfiit imarsiornermilu inuussutissarsiornerup ataatsimoortinniarnera qilanaaraarput, ataatsimut inuussutissarsiornermik ineriartortitsinissamut sammisassanullu amerlanernut kajumilersitsinissaq pilersissallugu, ataatsimut sinaakkutissat sulissutigalugit unammilligassallu ataatsimut aaqqiivigalugit,” Sikuki Nuuk Harbourimi pisortaq John Rasmussen oqaaseqarpoq.

Suliassaqarfimmi suliffeqarfinnut qaaqqusissutinik agguaassisoqarpoq, isumaqanngilarlu attaveqaat matoqqasuusoq. Suliffeqarfiit tamarmik imarsiornermut tunngasunik soqutigisallit tikilluaqqusaapput maajip ulluisa sisamaanni nal.8.45-13.00 Hotel Hans Egedemi.  Covid-19 eqqarsaatigalugu peqataanissamut nalunaartoqassaaq uunga asjr@sermersooq.gl.