Ukiuni tulliuttuni sisamani Kommuneqarfik Sermersuumi siuttunngortussat tassaalerput Inuit Ataqatigiit, Demokraatit aamma Naleraq. Partiit pingasuusut suleqatigiinnissamut isumaqatigiissummik atsioqatigeeqqammerput ima taaneqartumik: “Kommuneqafik Sermersooq – Kommune illoqarfittut pingaarnersaqarfik siuariartorfiusoq.”
”Kommunip nangittumik ineriartorteqqinneqarnissaanut taama siammasitsigisumik toqqammaviliisinnaanerput assut nuannaarutigaara”, maannakkut borgmesteriusoq borgmesterinngoqqittussarlu, Charlotte Ludvigsen Inuit Ataqatigiinneersoq taama oqarpoq.
Suleqatigiinnissamut isumaqatigiissummiipput illoqarfinni assigiinngitsuni nangittumik inissialiortiterneq, meeqqat atuarfiata pitsanngorsarneqarnissaa, meeqqeriviit amerlanerusut, inuussutissarsiuteqartut siuariartortut, meeqqanut, ilaqutariinnut, utoqqarnut aamma inunnut innarluutilinnut neqeroorutit pitsaanerusut. Tamakku saniatigut Kommuneqarfik Sermersuup kommunitut piujuartitsisuunissaa isumaqatigiissuteqarnikkut naqissuserneqarpoq.
Partiinit tamanit politikkikkut suliniutiginiakkat
”Ilaqutariit atugaat aamma inissaqarnissamut pisinnaatitaaffeqarneq Inuit Ataqatigiinnut pingaaruteqarluinnartutut inissisimapput. Taamaammat kommune tamakkerlugu ineriartortitsisoqarnissaanik aallartitsisimanerput taama siammasitsigisumik tunuliaqutserneqarmat takullugu nuannerpoq”, borgmesteri oqarpoq.
”Namminersortutut suliffeqarfiutillit siuarsarneqarnissaannut kommunip tungaaniit nangittumik pitsaasunik atugassaqartinneqarniarneri Demokraatit tungaanniit nuannaarutigaarput”, Justus Hansen Demokraatineersoq oqarpoq.
”Kommunitsinni inoqarfiit tamarmik, pingaartumik Nunatta Kangiatungaaniittut, tassa Ittoqqortoormiit aamma Tasiilap isumaqatigiissutitigut eqqarsaatigineqarneri Naleqqamiit nuannaarutigaavut, Pele Broberg Naleqqamiit taama oqarpoq.
Borgmesteri, borgmesterip tullia siulleq tulliatalu aappaa ataatsimiititanullu ilaasortat maajip ulluisa pingajuanni kommunalbestyrelsip inissitsiterluni ataatsimiinnerani pisortatigoortumik toqqarneqassapput. Ataatsimiititani siulittaasussat kingorna ataatsimiititat inissitsiterlutik ataatsimiinnerinni toqqarneqassapput.
Isumaqatigiissut tamaat uani atuarsinnaavat.
