Marlunngorneq apriilip ulluisa arfernanni Nuna tamakkerlugu Inatsisartunut kiisalu Kommuneqarfik Sermersuumi Kommunalbestyrelsimut, Nunaqarfimmi Aqutsisunut Ilagiillu sinniisaannut qinersisoqassaaq.
Qinersileruit qanoq iliussanerlutit uani atuaruk.
Ullormi qinersiffissami sui qinersissaanga?
Kommunip illoqarfiini nunaqarfiinilu tamani qinersivissatut pilersaarutaasuni qinersisinnaavutit.
- Nuuk: Illorsuaq timersortarfik Inussivik
- Illoqarfiit nunaqarfiillu allat: Allattorsimaffik uani takuuk
Qaqugu qinersisinnaavunga?
- Marlunngorneq apriilip ulluisa arfernanni 2021-mi qinersiviit nal. 09.00 ammassapput nal. 20.00 matussallutik.
- Qinersiartortut tamarmik qinersivimmi siuleriinni utaqqisuniittut matut matoreernerini qinersisinnaatitaapput.
Qinersinialeruma qanoq iliortoqassava?
Allakkatigut qinersereersimaguit iliuuseqaqqittariaqanngilatit.
Qinersivimmut iserfissaq
Allakkatigut qinersereersimanngikkuit ullormi qinersiffiusumi najukkami qinersivimmut aggerlutit qinersiartussaatit piffissami nal. 09.00-imiit nal. 20.00 tungaanut.
Pitsorluttunut innarluutilinnullu biiliutsinneq neqeroorutigineqassaaq. Biiliutsinnissamik inniminniinissamut attavissat:
499277 (Paamiut)
598215 (Tasiilaq)
582248 / 586193 / 368068 (Nuuk)
Pingaartumik Nuummi:
- Inussivimmut aqqut ataasiinnarmik sammivilik
Nuummi qinersivissamut Inussivimmut aqqut ataasiinnarmik sammiveqassaaq: Kissarneqqortuunnguaq aqqutigalugu qinersivimmut (Illorsuaq Timersortarfiup eqqaatigut) siumut ingerlasoqassaaq, Børnehjemsvejikkut utimut ingerlasoqassalluni, taamaalilluni Børnehjemsvejikkut qummut biilinik ingerlasoqarnissaa inerteqqutaassalluni.
- Qinersinermut atatillugu bussit
Nuummi qinersissaguit qinersinermut atatillugu bussit ingerlaartut ilaaffigisinnaavatit. Akeqanngillat. Angallassinermut pilersaarut uani takuuk.
Corona pissutigalugu killilersuineq
Corona pissutigalugu killilersuineq peqqutigalugu qinersiartortut tamarmik kaammattorneqassapput qinersivinni qanermut assiaqut atoqqullugu. Qanermut assiaqut qinersivimmi kaammattuummut malinnikkusuttunut tunniunneqartassaaq.
Aammattaaq inuit qassit ataatsikkut qinersivimmi isersimasinnaanersut killilersuisoqassaaq. Imaassinnaavoq qinersiviup silataani iseruillu utaqqisariaqassasutit. Qinersinermi suleqataasut siuleriiaanut, ungasissusermut, illersuutit taasinermilu periutsimut ilitsersuutaat malinneqassapput. Nalornisooruteqassagaluaruit aperiinnassaatit.
Iseruit qinersinialeruillu
Qinersinialernermi periuseq kommunimi sumiiffinni tamani tamaat isigalugu assigiippoq.
- Atit inuuiillu oqaatigissavatit qinersinermi suleqataasup qinersisussat allassimaffianni nanisinnaaniassammatit.
- Nuummi qinersinermi suleqataasoq orninnginnerani inuuiit aallaavigalugu siuleriiaanut ilanngutereersimassaatit.
- Qinigassaq sorleq qinersivigissanerlugu oqassaatit.
- Allagartamik qinersivissamik tunineqassaatit taasivimmullu isissallutit.
- Taasivimmi qinigassanut assigiinngitsunut qinigassanngortittut allattorsimaffii takusinnaavatit.
- Allagartami qinersiffissami kina imaluunniit partii sorleq qinernerlugu nalunaaqutsissavat. Allagartami qinersiffissami taamaallaat ataatsimik krydsiliissaatit.
- Allagartani qinersivissani tamani krydsileereeruit qinersiviup silataani taasinernik nakkaatitsivinnut allagartat nakkartissavatit.
Qinigassat sorliit qinersivigissavakka?
Nunaqarfiit
Nunaqarfimmi najugaqaruit ukua qinersivigisinnaavatit:
- Inatsisartunut qinersineq
- Kommunalbestyrelsimut qinersineq
- Nunaqarfinni Aqutsisunut qinersineq
Nunaqarfimmiikkuit ukua qinersivigisinnaanngilatit:
- Ilagiit sinniisaat
(Nunaqarfinni ilagiit sinniisaannut taasinertaqanngitsumik qinersisoqassaaq)
Paamiut, Tasiilaq imaluunniit Ittoqqortoormiit
Paamiuni Tasiilami Ittoqqortoormiiniluunniit najugaqaruit ukua qinersivigisinnaavatit:
- Inatsisartunut qinersineq
- Kommunalbestyrelsimut qinersineq
Paamiuni Tasiilami Ittoqqortoormiiniluunniit najugaqaruit ukua qinersivigisinnaanngilatit:
- Nunaqarfinnut aqutsisussanik qinersineq
(Nunaqarfinni taamaallaat nunaqarfinni aqutsisunut qinersisoqassaaq)
- Ilagiit sinniisaat
- (Illoqarfinni minnerni tamani ilagiit sinniisaannut taasinertaqanngitsumik qinersisoqassaaq)
Nuuk
Nuummi najugaqaruit ukua qinersivigisinnaavatit:
- Inatsisartunut qinersineq
- Kommunalbestyrelsimut qinersineq
- Ilagiit sinniisaat
Nuummi najugaqaruit ukua qinersivigisinnaanngilatit:
- Nunaqarfinnut aqutsisussanik qinersineq
(Nunaqarfinni taamaallaat nunaqarfinni aqutsisunut qinersisoqassaaq)
Allakkatigut qinersinermut suli angumersisinnaavunga?
Qinigassaq apeqqutaalluni allakkatigut qinersinerit assigiinngitsunik killeqarput.
Taassuma saniatigut poorskip ulluini 1/4, 2/4, 4/4, 5/4 allakkatigut qinersisoqarsinnaanngilaq.
Kommunalbestyrelsimut, Nunaqarfimmi Aqutsisunut ilagiillu sinniisaannut qinersinissat marlunngornermi apriilip ulluisa arfernanni 2021-mi nal. 20.00-imut killeqarput. Qinersinerit kisitsinermi ilaassappat illit nammineq akisussaaffigaat piffissaqarluarlutit qinersiartornissat.
Inatsisartunut qinersinissaq siusinnerusukkut killeqartinneqarpoq. Arfininngornermi apriilip ulluisa pingajuanni 2021-mi allakkatigut qinersinissamut periarfissaq kingulliuvoq. Malugiuk, Kommuneqarfiup Allaffia, Innuttaasunik sullissivik, nunaqarfinnilu kommunip allaffii poorskimi sapaatip akunneratalu naanerani matoqqassammata.
- Pingaartumik Nuummi arfininngornermi apriilip ulluisa pingajuanni allakkatigut Inatsisartunut qinersinissamut periarfissaqarpoq. Periarfissaq tamanna atorluarusukkukku Sermersuumi Mobilvagti 23 76 21-mut ulluunerani ulloq taanna sianerfigisinnaavat. Tamatuma kingorna Mobilvagti Innuttaasunut Kiffartuussivimmukassaaq imaluunnit qaqugu allakkatigut qinerserusuttuusutit isertissinnaassaneraatit isumaqatigiissaasi. Taamaattumik allakkatigut qinersiartorlutit piffissami isumaqatigiissutigineqartumi nammineerlutit Innuttaasunut Kiffartuussivimmukassaatit.
Qaqugu Qinersinermi inernerit piariissappat?
Eqqoqqissaartumik siulittuutigineqarsinnaanngilaq qaqugu taasinerit tamarmik inernerit kisitsineq naammassissanersoq. Pingasunngornermi unnuup ingerlanerani apriilip ulluisa arfineq aappaanniluunniit Kommuneqarfik Sermersuumi tamanut nalunaarutigineqassasut pilersaarutaavoq.
Taasinerit amerlassusiisa katinneri (qinersinersisoqarmat taasinerit procentii) ullormi taasivimmi nalunaaquttap akunneri marlukkaapajaarlugit tamanut nalunaarutigineqartassapput.